नाशिक (इंडिया दर्पण वृत्तसेवा) – कांदा निर्यातबंदीवर सरकारने नुकताच घेतलेल्या निर्णयावर ठाकरे गटाचे खासदार संजय राऊत यांनी टीका केली. ते नाशिकमध्ये पत्रकारांशी बोलतांना म्हणाले की, मोदी, शहांनी शेतकऱ्यांची फसवणूक केली त्यांच्या लोकांना कांदा निर्यातीचे कंत्राट देवून त्यांचा फायदा केला. सरकारची घोषणा म्हणजे निव्वळ धुळफेक व खोटारडेपणा आहे. गुजरातच्या व्यापारी, ठेकेदाराला फायदा पोहचवणे हा निर्यातबंदी उठवण्यामागचा उद्देश आहे. महाराष्ट्रातील शेतक-यांना त्याचा फायदा नाही. निर्यातबंदी उठवली ते लहान देश आहेत, अफगाणिस्तान, बहरीन, मॅारिशेस हे छोटे देश आहे. येथे आपल्यापेक्षा स्वस्त कांदा आहे.
यावेळी त्यांनी विविध प्रश्नांनाही उत्तरे दिली ते म्हणाले, नरेंद्र मोदी आणि अमित शहा यांना भविष्यात महाराष्ट्राचे तुकडे करायचे आहे.
मुंबईला कंगाल करायच आहे. त्यांना अडचण शरद पवार आणि उद्धव ठाकरे यांची होती. त्यामुळे त्यांनी सरकार पाडलं मोदी आणि शहा यांना भविष्यात याची किंमत चुकवावी लागेल. मोदी दहा वर्षात सतत खोटं बोलतात. खोटं बोलण्याचा त्यांचा जागतिक विक्रम लवकरच गिनीज बुकात जाईल. खोटं बोलण्याचा विक्रम ऑलम्पिक मध्ये जाईल का हे पाहायला हवं.
यावेळी त्यांनी देवेंद्र फडणवीस यांच्यावरही टीका केली. तुम्ही आमच्या नादाला लागा, तुमच्या नादाला लागण्या इतपत तुम्ही मोठे नेते नाहीत
देवेंद्र फडणवीस यांचे राजकारण फार दिवस चालणार नाही. राज्यात फक्त फोडाफोडीचे राजकारण झाले. भाजपाचा चेहरा राज्यात फडणवीस असतील तर भाजपला फटका बसेल असेही ते म्हणाले.
यावेळी त्यांनी राज्यात ३० ते ३५ जागा आम्हाला राज्यात मिळतील. २०१४ ला नरेंद्र मोदी यांना जो प्रतिसाद मिळत होता तो प्रतिसाद आता राहुल गांधी यांना मिळत आहे.
