इंडिया दर्पण ऑनलाईन डेस्क
सांगली वेगवेगळ्या कारणाने सध्या चर्चेत आहे. आता ओबीसी बहुजन पक्षाचे सांगली लोकसभेचे उमेदवार प्रकाश अण्णा शेंडगे यांच्या गाडीला अज्ञातांकडून चपलांचा हार घालण्यात आल्यामुळे या घटनेची चर्चा रंगली आहे. चपलांच्या हाराबरोबरच या घटनेत गाडीवर शाई फेकण्यात आली. याशिवाय गाडीच्या समोरच्या काचेवर एक धमकीचे पत्रही चिटकवण्यात आले आहे.
हॉटेल ग्रेट मराठासमोर शेंडगे यांची कार उभी होती. रात्री अज्ञातांकडून हा प्रकार करण्यात आला. कारच्या काचेवर धमकीवजा इशारा लावण्यात आला आहे. शेंडगे यांनी निषेध केला असून चौकशी करण्याची मागणी केली आहे. या पत्रात म्हटले आहे, की शेंडगे तुला मराठा समाज पाडल्याशिवाय गप्प बसणार नाही. भुजबळाने जशी नाशिकमध्ये माघार घेतली, तशी तू घे. धनगर आणि मराठ्यांच्या नादी लागू नका, नाहीतर तुला महाराष्ट्रात फिरू देणार नाही. मराठ्याला विरोध केला, तर चपलेचा हार गळ्यात घालू असे म्हटले आहे.
