नाशिक (इंडिया दर्पण वृत्तसेवा)- मखमलाबाद येथील शांतीनगर आणि पेठरोड भागात अवघ्या ३५ मिनीटांच्या कालावधीत सोमवारी (दि.२२) दोन चैनस्नॅचिंगच्या घटना घडल्या. वेगवेगळया भागातून रस्त्याने पायी जाणा-या दोन महिलांच्या गळयातील मंगळसूत्र व सोनसाखळी दुचाकीस्वार भामट्यांनी ओरबाडून नेल्या असून याप्रकरणी म्हसरूळ पोलीस ठाण्यात एकत्रीत गुन्हा दाखल करण्यात आला आहे.
संगिता मुकूंद सोनार (रा.मयुर अपा.उदयनगर मखमलाबाद) यांनी याबाबत फिर्याद दिली आहे. सोनार या सायंकाळी साडे सात वाजेच्या सुमारास शांतीनगर परिसरातील मयुर अपार्टमेंट या इमारतीसमोरून पायी जात असतांना दुचाकीवर आलेल्या भामट्यांनी त्यांच्या गळय़ातील मंगळसूत्र हिसकावून नेले.
दुसरी घटना पेठरोडवरील ओमकारनगर भागात घडली. ओमकारनगर भागात राहणारी महिला रात्री सव्वा आठ वाजेच्या सुमारास परिसरात फेरफटका मारीत असतांना ही घटना घडली. सुवर्ण हॉस्पिटल परिसरातून सदर महिला पायी जात असतांना दुचाकीस्वार भामट्यांनी तिच्या गळयातील सोनसाखळी खेचून नेली. अवघ्या ३५ मिनीटांच्या कालावधीत घडलेल्या या दोन्ही घटनांमध्ये भामट्यांनी सुमारे १ लाख ७५ हजार रूपये सोन्याचे अलंकार हिसकावून नेले असून अधिक तपास उपनिरीक्षक पठारे करीत आहेत.
