इंडिया दर्पण ऑनलाईन डेस्क
सोलापूर: माढा लोकसभा मतदार संघात भाजपला धक्या मागून धक्के बसत आहे. माळशिरस येथील धनगर समाजाचे नेते उत्तम जानकर आज मेळाव्यात राष्ट्रवादी शरद पवार गटाला साथ देण्याची घोषणा करणार असल्यामुळे येथील राजकीय गणित पूर्ण बदलणार आहे. जयंत पाटील, जयसिंह मोहिते पाटील आणि राष्ट्रवादी उमेदवार धैर्यशील मोहिते पाटील यांच्या उपस्थितीत ते पवार यांना साथ देण्याची घोषणा करणार असल्याचे बोलले जात आहे.
जानकर यांच्या गरुड बंगल्यावर शेकडो कार्यकर्त्यांसमोर दोन्ही मोहिते पाटील आणि जानकर यांच्या गटातील ३० वर्षाचे वैर संपवून मनोमिलन घडवून आणण्याची किमया शरद पवार हे करणार आहेत.
भाजपकडून वारंवार फसवणूक झाल्याची कार्यकर्त्यांची भावना आहे. जानकर यांच्या फडणवीस यांच्या सोबत तीन बैठक झाल्या. त्यात जानकर यांचे समाधान झाले असले, तरी कार्यकर्ते मात्र ऐकण्याच्या मनस्थितीत नाहीत. जानकर यांनी काल पुणे येथे जाऊन धैर्यशील मोहिते पाटील यांच्यासोबत शरद पवार यांची भेट घेऊन सल्ला घेतल्याचे त्यांनी सांगितले होते. आपला निर्णय उद्याच्या मेळाव्यात जाहीर करणार असून कार्यकर्त्यांना फडणवीस आणि पवार यांच्याशी झालेल्या चर्चेची माहिती देऊन कार्यकर्त्यांना निर्णय काय घ्यायचा हे विचारले जाणार असल्याचे त्यांनी सांगितले.
