नाशिक (इंडिया दर्पण वृत्तसेवा)- अल्पवयीन तरूणांच्या टोळक्याने एकावर प्राणघातक हल्ला केल्याची घटना मनपाच्या रामायण बंगला भागात घडली. या घटनेत धारदार शस्त्रांचा वापर करण्यात आल्याने युवक जखमी झाला असून, याप्रकरणी सरकारवाडा पोलीस ठाण्यात गुन्हा दाखल करण्यात आला आहे. पोलीसांनी संशयितांपैकी एकास अटक केली असून उर्वरीतांना ताब्यात घेतले आहे.
दर्शन शिवाजी भोसले (२३ रा.अशोकनगर) असे अटक करण्यात आलेल्या संशयिताचे नाव असून त्याचे सहा साथीदार अल्पवयीन असल्याचे कळते. या हल्यात ऋषीकेश भोसले हा युवक गंभीर जखमी झाला आहे. मंगळवारी (दि.१६) रात्री रामायण बंगल्याच्या पाठीमागे दोन गटात तुंबळ हाणामारी सुरू असल्याची माहिती पोलीसांना मिळाली होती.
पोलीसांनी धाव घेतली असता या ठिकाणी भोसले गंभीर अवस्थेत मिळून आला. त्याच्यावर धारदार शस्त्राने हल्ला करण्यात आल्याने त्यास उपचारार्थ रूग्णालयात दाखल करण्यात आले असून याबाबत हवालदार अनिल जाधव यांनी दिलेल्या फिर्यादीवरून गुन्हा दाखल करण्यात आला आहे. अधिक तपास उपनिरीक्षक चव्हाण करीत आहेत.
