नाशिक (इंडिया दर्पण वृत्तसेवा)– शहरात चैनस्नॅचरांचा सुळसुळाट झाला असून, महिला वर्गास एकटे दुकटे वावरणे कठीण झाले आहे. वेगवेगळया ठिकाणी रस्त्याने पायी जाणा-या दोन महिलांच्या गळय़ातील मंगळसूत्र दुचाकीस्वार भामट्यांनी ओरबाडून नेले. त्यात एका नोकरदार महिलेसह वृध्देचा समावेश आहे. याप्रकरणी म्हसरूळ व इंदिरानगर पोलीस ठाण्यात जबरीचोरीच्या नोंदी करण्यात आल्या आहेत.
मखमलाबाद येथील सरिता राहूल गांगुर्डे (रा.रामकृष्णनगर) ही नोकरदार महिला मंगळवारी (दि.१६) रात्री जेवण आटोपून फेरफटका मारण्यासाठी घराबाहेर पडल्या असता ही घटना घडली. घर परिसरातून त्या रस्त्याने पायी जात असतांना दुचाकीवर आलेल्या भामट्यांनी त्यांच्या गळय़ातील सुमारे ७० हजार रूपये किमतीचे सोन्याची शॉट पोत हिसकावून नेली. याबाबत म्हसरूळ पोलीस ठाण्यात गुह्याची नोंद करण्यात आली असून अधिक तपास हवालदार भोये करीत आहेत.
दुसरी घटना इंदिरानगर जॉगिंग ट्रॅक भागात घडली. शैला बाळकृष्ण भोंडे (७५ रा.पाथर्डी रोड) यांनी याबाबत फिर्याद दिली आहे. भोंडे सोमवारी (दि.१५) सकाळच्या सुमारास इंदिरानगर जॉगिंग ट्रॅकच्या दिशेने शतपावलीसाठी जात असतांना ही घटना घडली. रस्त्याने त्या पायी जात असतांना श्रीजी संकल्प बिल्डीग जवळ समोरून दुचाकीवर आलेल्या भामट्यांनी त्यांच्या गळय़ातील सुमारे ४५ हजार रूपये किमतीची माळ ओरबाडून नेली. याबाबत इंदिरानगर पोलीस ठाण्यात गुन्हा दाखल करण्यात आला असून अधिक तपास जमादार साळी करीत आहेत.
