नाशिक (इंडिया दर्पण वृत्तसेवा)- लहवित येथे १६ वर्षीय दहावीच्या विद्यार्थ्याचा हृदयविकाराने मृत्यू झाल्याची दुर्दैवी घटना घडली. तेजस आहेर (१६) रा. लहवित, असे विद्यार्थ्यांचे नाव आहे. तेजस हा घरीच कुटुंबीयांसोबत बसलेला असताना अचानक भोवळ येऊन खुर्चीवरून खाली पडला. त्यानंतर कुटुंबियांनी तेजसला तातडीने रुग्णालयात दाखल केले. पण, त्याचा फारसा उपयोग झाला नाही.
तेजसच्या दहावीच्या परिक्षा नुकत्याच संपल्या होत्या. त्यानंतर ही घटना घडली. आय. टी. इंजिनिअर होण्याचे तेजसचे स्वप्न होते. लहवितचे शेतकरी विठ्ठल महादू आहेर यांचा तेजस हा मुलगा असून, त्याच्या निधनाने परिसरात हळहळ व्यक्त केली जात आहे. तेजस हा मविप्र समाज संस्थेच्या जनता विद्यालयात शिकत होता. दहावीच्या पेपरसाठी त्याने खूप मेहनत घेतली होती.
