नाशिक (इंडिया दर्पण वृत्तसेवा) – शहरात अपघाताची मालिका सुरुच असून दोन वेगवेगळय़ा भागात झालेल्या अपघातांमध्ये दोन दुचाकीस्वारांचा मृत्यू झाला. तर बुलेटस्वार जखमी असून त्याच्यावर उपचार सुरू आहेत. याप्रकरणी मुंबईनाका आणि अंबड पोलीस ठाण्यात अपघाताच्या नोंदी करण्यात आल्या आहेत.
पहिला अपघात कामटवाडा भागात झाला. या अपघातात केतन केशव चव्हाण (३० रा.कृष्णा कॉम्प्लेक्स,बनकरचौक काठेगल्ली) हा दुचाकीस्वार ठार झाला. केतन चव्हाण गेल्या २९ मार्च रोजी रात्रीच्या वेळी कामटवाडा भागातून आपल्या दुचाकीवर प्रवास करीत असतांना अज्ञात भरधाव चारचाकीने दुचाकीस धडक दिली होती. या घटनेत केतन चव्हाण गंभीर जखमी झाला होता. उपचारादरम्यान त्याचा मृत्यू झाला. याबाबत प्रियंका पवार यांनी दिलेल्या फिर्यादीवरून अंबड पोलीस ठाण्यात अपघाताची नोंद करण्यात आली आहे. अधिक तपास पोलीस नाईक टिळेकर करीत आहेत.
दुस-या अपघातात सौरभ हंसराज गुप्ता (२६) व रवी सुभाष दानोदिया (२७ रा. दोघे राजीवनगर) हे दोघे मित्र शनिवारी (दि.१३) गोल्फक्लब परिसरातून आपल्या बुलेटवर डबलसिट प्रवास करत असतांना झाला. पश्चिम गेट भागात पाठीमागून भरधाव आलेल्या अन्य मोटारसायकलने कट मारल्याने बुलेट घसरून दोघे जमिनीवर कोसळले होते. या घटनेत पाठीमागे बसलेल्या सौरभ गुप्ता याचा मृत्यू झाला असून, रवी दानोदिया गंभीर जखमी आहे. याबाबत मुंबईनाका पोलीस ठाण्यात अज्ञात दुचाकीस्वाराविरोधात गुन्हा दाखल करण्यात आला असून अधिक तपास हवालदार देविदास गाढवे करीत आहेत.
