नाशिक (इंडिया दर्पण वृत्तसेवा)- पेठरोडवरील फुलेनगर भागात धारदार शस्त्राने वार करीत टोळक्याने तरूणास लुटल्याची घटना घडली. या घटनेत टोळक्याने जखमी तरूणाच्या खिशातील दहा हजाराची रोकड बळजबरीने काढून घेत पोबारा केला असून याप्रकरणी पंचवटी पोलीस ठाण्यात गुन्हा दाखल करण्यात आला आहे.
विक्की वाघ,अनिल चव्हाण व त्यांचे दोन अनोळखी साथीदार अशी लुटमार करणा-या संशयितांची नावे आहेत. याबाबत अंकुश लहू मासळकर (२३ रा.तीन पुतळयामागे,फुलेनगर) या युवकाने याप्रकरणी तक्रार दाखल केली आहे. मासळकर हा युवक गुरूवारी (दि.११) सायंकाळच्या सुमारास शनिमंदिर परिसरातून आपल्या घराकडे जात असतांना ही लुटमार झाली. टोळक्याने त्याची वाट अडवत पैश्याची मागणी केली.
यावेळी मासळकर याने पैसे देण्यास नकार दिल्याने संशयित टोळक्याने त््यास शिवीगाळ व धक्काबुक्की करीत त्याच्यावर धारदार शस्त्राने वार केले. या घटनेत युवक जखमी होताच संशयितांनी त्याच्या खिशातील दहा हजाराची रोकड बळजबरीने काढून घेत पोबारा केला असून अधिक तपास सहाय्यक निरीक्षक बापू रायकर करीत आहेत.
