नाशिक (इंडिया दर्पण वृत्तसेवा) -भरदिवसा झालेल्या घरफोडीत सुमारे ३३ हजाराच्या ऐवजावर डल्ला मारला. मखमलाबाद येथील स्वामीनगर भागात झालेल्या या घरफोडीत चोरट्यांनी रोकडसह सोन्याचांदीचे दागिने चोरुन नेले. याप्रकरणी म्हसरूळ पोलीस ठाण्यात गुन्हा दाखल करण्यात आला आहे.
राजीव बसगोंडा औरादकर (रा.स्वामी निवास सोसा.स्वामीनगर) यांनी याबाबत फिर्याद दिली आहे. औरादकर कुटूंबिय बुधवारी (दि.१०) कामानिमित्त घराबाहेर पडले असता ही घटना घडली. अज्ञात चोरट्यांनी त्यांच्या बंद घराचा कडीकोयंडा तोडून कपाटात ठेवलेले सोन्याचे गंठण आणि रोकड असा सुमारे ३३ हजाराचा ऐवज चोरून नेला. अधिक तपास उपनिरीक्षक हाके करीत आहेत.
कामगारांचे तीन मोबाईल चोरीला
नाशिक (इंडिया दर्पण वृत्तसेवा) – बांधकाम साईटवरून कामगारांचे तीन मोबाईल चोरट्यांनी चोरून नेल्याची घटना रोहिणीनगर भागात घडली. या घटनेत सुमारे २० हजार रूपये किमतीचे मोबाईल भामट्यानी पळविले असून याप्रकरणी पंचवटी पोलीस ठाण्यात चोरीचा गुन्हा दाखल करण्यात आला आहे.
रविकुमार केशावराम चौधरी (मुळ रा.उत्तरप्रदेश हल्ली गडाख हॉस्पिटल समोर, रोहिणीनगर) यांनी फिर्याद दिली आहे. चौधरी यांच्यासह अन्य कामगार गेल्या शुक्रवारी (दि.५) रात्री गडाख हॉस्पिटल शेजारी नव्याने सुरू असलेल्या बांधकाम साईटवर काम करीत असतांना ही घटना घडली. अज्ञात चोरट्यांनी कामगारांचे सुमारे २० हजार रूपये किमतीची तीन मोबाईल चोरून नेले. अधिक तपास हवालदार माळोदे करीत आहेत.
