मुंबई (इंडिया दर्पण वृत्तसेवा) – राज ठाकरे हा वाघ माणूस, पण त्यांना कोल्हा करण्याचे प्रयत्न भाजप कडून सुरू आहे. दिल्लीच्या सत्तेपुढे कधी झुकणार नाही असे छातीठोक पणे सांगणाऱ्या राज ठाकरेंना दिल्लीची वारी करून यावं लागलं असे सांगत विरोधी पक्षनेते विजय वडेट्टीवार यांनी टीका केली आहे.
आज मनसेची शिवतीर्थावर राज ठाकरे यांची गुढीपाडव्यानिमित्त सभा आहे. त्याअगोदर वडेट्टीवार यांनी सोशल मीडियावर ही पोस्ट टाकली आहे.
लोकसभा निवडणुकीत मनसे – भाजप युती होईल अशी चर्चा होती व ती अजूनही आहे. पण, त्यानंतर मात्र युती झाली की नाही हा प्रश्न सर्वांच्या मनात आहे. त्यामुळे शिवतीर्थावर होणा-या आजच्या सभेत मोठे खुलासे राज ठाकरे करणार असल्यामुळे या सभेकडे सर्वांचे लक्ष लागले आहे.
त्यातच काँग्रेसने या सभेअगोदर ही टीका केली आहे.मनसेने आपल्या अधिकृत ट्विटर हॅडलवरुन गुढीपाडव्याच्या मेळाव्याचा ट्रेलर लॅान्च केला आहे. त्यात नक्की काय घडलंय, काय घडतंय ..हे मला आपल्याशी प्रत्यक्ष बोलायचे आहे. अशा कॅप्शनसह राज ठाकरे यांनी गुढीपाडवा मेळाव्याचा ट्रेलर पोस्ट केला आहे. त्यामुळे आजच्या सभेत राज ठाकरे काय निर्णय़ घेतात याकडे सर्वांचे लक्ष लागले आहे.
