इंडिया दर्पण ऑनलाईन डेस्क
जळगावः राष्ट्रवादी काँग्रेस पार्टी शरदचंद्र पवार पक्षाचे ज्येष्ठ नेते एकनाथ खडसे हे दोन दिवसात भाजत प्रवेश करणार असले तरी त्यांची कन्या रोहिणी खडसे मात्र शरद पवार गटातच राहणार आहे. त्यांनी सोशल मीडियावर एक पोस्ट टाकून म्हटले आहे की, मी राष्ट्रवादी महिला काँग्रेस शरदचंद्र पवार पक्षाची प्रदेशाध्यक्षा म्हणून काम करीत आहे, मी याच पक्षात आहे व भविष्यातही याच पक्षात राहणार आहे. मी आदरणीय शरदचंद्र पवार साहेबांसोबतच…लढ़ेंगे और जीतेंगे
गेल्या काही दिवसांपासून खडसे यांच्या भाजप प्रवेशाची चर्चा सुरू आहे. खडसे यांच्या दिल्ली-मुंबई वारीमुळे या चर्चेला जोर चढला होता. पण, खडसे यांनी प्रवेशाच्या चर्चेला नकार दिला होता. पण, आता त्यांनीच प्रवेश करणार असल्याची माहिती दिल्यानंतर रोहिणी खडसे काय करणार असा प्रश्न विचारला जात होता. त्या राष्ट्रवादीच्या महिला आघाडीच्या प्रदेशाध्यक्ष आहे. त्यामुळे त्यांच्या निर्णयाकडे सर्वांचे लक्ष होते. पण, त्यांनी आज त्यांची भूमिका स्पष्ट केली.
खडसे हे गुरुवारी रात्री ते रोहिणी यांच्यासह मुंबईला गेले होते. तिथे ते पवार यांना भेटून भाजप प्रवेशाची माहिती देणार होते. पण शरद पवार अचानक पुण्याला गेल्यामुळे त्यांची त्यांच्याशी भेट होऊ शकली नाही. शरद पवार यांना विश्वासात घेईपर्यंत खडसे पक्षांतर करणार नाहीत, असे सांगितले जात आहे. पण, खडसे भाजपमध्ये जाणार असले तरी रोहिणी मात्र राष्ट्रवादीच्या शरद पवार गटात राहणार आहे.
