नाशिक (इंडिया दर्पण वृत्तसेवा)- बुधवार पेठेत दुचाकी पार्क करीत असतांना एकाने ६५ वर्षीय वृध्दावर लोखंडी रॉडने हल्ला केल्याची घटना घडली. या घटनेत डोक्यावर आणि हातावर रॉड मारण्यात आल्याने वृध्द जखमी झाले असून याप्रकरणी भद्रकाली पोलीस ठाण्यात गुन्हा दाखल करण्यात आला आहे.
पवन पगार (रा.रंगारवाडा शाळा छपरीची तालीम,जुने नाशिक ) असे संशयित हल्लेखोराचे नाव आहे. याबाबत दिलीप गोविंदराव लाड (६५ रा.मोहन सोसा.कुटे हॉस्पिटल शेजारी,मुंबईनाका) यांनी फिर्याद दिली आहे. लाड सोमवारी (दि.१) सायंकाळच्या सुमारास बुधवार पेठेत गेले होते. छपरीची तालीम भागात ते आपली दुचाकी पार्क करीत असतांना ही घटना घडली.
लोखंडी रॉड घेवून आलेल्या संशयिताने कुठलेही कारण नसतांना लाड यांच्यावर हल्ला केला. या घटनेत दोन्ही हातांवर आणि डोक्यावर रॉडने मारहाण करण्यात आल्याने ते जखमी झाले असून अधिक तपास उपनिरीक्षक मंद्रुपकर करीत आहेत.
