नाशिक (इंडिया दर्पण वृत्तसेवा) – सिडकोतील दत्तचौक भागात भरदिवसा सोसायटीच्या वॉचमनरूमचा पत्रा उचकटून भामट्यांनी अडीच लाखाचा ऐवज चोरून नेला. त्यात सोन्याचांदीच्या दागिण्यांसह रोकडचा समावेश आहे. याप्रकरणी अंबड पोलीस ठाण्यात गुन्हा दाखल करण्यात आला आहे.
सलीमा नाजिम शेख (रा.बुरकुले संकुल,दत्तचौक) यांनी याबाबत फिर्याद दिली आहे. शेख कुटुंबिय बुरकुले संकुल येथील एका सोसायटीच्या पार्किंगमध्ये असलेल्या वॉचमनरूममध्ये राहतात. ३० मार्च रोजी शेख कामानिमित्त बाहेर पडले असता ही घटना घडली.
अज्ञात चोरट्यांनी त्यांच्या पत्र्याच्या रूमचा पत्रा उचकटून घरात प्रवेश केला. त्यानंतर लोखंडी पेटीचे कडीकोयंडा तोडून पेटीतील रोकड व सोन्याचांदीचे दागिणे असा सुमारे २ लाख ५८ हजाराचा ऐवज चोरून नेला. अधिक तपास उपनिरीक्षक शेवाळे करीत आहेत.
