इंडिया दर्पण ऑनलाईन डेस्क
छत्रपती संभाजीनगर शहरात अग्नी तांडव पाहायला मिळाले. एका कापडाच्या दुकानाला भीषण आग लागली. त्यात ही दुर्दैवी घटना घडली. आज पहाटे तीन वाजता लागलेल्या भीषण आगीत वरच्या मजल्यावर असलेल्या एकाच कुटुंबातील सात जणांचा होरपळून मृत्यू झाला. मृतांत दोन पुरुषांसह तीन महिला आणि दोन मुलांचा समावेश आहे.
आग लागलेल्या इमारतीत एकूण १६ लोक होते. पहिल्या आणि दुसऱ्या मजल्यावर प्रत्येकी सात तर तिसऱ्या मजल्यावर दोन लोक होते. यामध्ये दुसऱ्या मजल्यावरील सर्व सात लोकांचा मृत्यू झाला आहे. छावणी दाना बाजारील गल्लीतील जैन मंदिराच्या शेजारी असणाऱ्या दुमजली घरात आग लागल्यामुळे पहाटे गाढ झोपेत असणाऱ्या लोकांना खाली उतरण्याची संधी मिळाली नाही. त्यामुळे सात जणांचा होरपळून मृत्यू झाला. हे सर्व जण एकाच कुटुंबातील होते.
एका ईव्ही दुचाकीमध्ये जोराचा स्फोट झाला. दुचाकीला चार्जिंगसाठी लावली होती. वायरच्या माध्यमातून आग थेट दुकानात लावलेल्या चार्जिंग सॉकेटपर्यंत पोहचली आणि दुकानाला आग लागली. कपड्याने पेट घेतल्याने काही वेळातच आग संपूर्ण दुकान आणि इमारतीत पसरली.
