इंडिया दर्पण ऑनलाईन डेस्क
नवी दिल्लीः भाजपचे ज्येष्ठ नेते लालकृष्ण अडवाणी यांना आज राष्ट्रपती द्रौपदी मुर्मू यांनी त्यांच्या घरी जाऊन भारतरत्न देऊन सन्मानित केले. या वेळी पंतप्रधान नरेंद्र मोदी, संरक्षण मंत्री राजनाथ सिंह, केंद्रीय गृहमंत्री अमित शाह उपस्थित होते.
अडवाणी यांच्या प्रकृती अस्वास्थ्यामुळे हा निर्णय घेण्यात आला. तीन फेब्रुवारी रोजी मोदी यांनी त्यांना भारतरत्न देण्याची घोषणा केली. माजी पंतप्रधान अटलबिहारी वाजपेयी आणि भाजपचे संस्थापक सदस्य नानाजी देशमुख यांच्यानंतर हा सन्मान मिळवणारे ते भाजप आणि राष्ट्रीय स्वयंसेवक संघाशी संबंधित तिसरे नेते आहेत.
राष्ट्रपतींनी शनिवारी राष्ट्रपती भवनात चार व्यक्तिमत्त्वांना मरणोत्तर भारतरत्न प्रदान केले. या मध्ये माजी पंतप्रधान चौधरी चरण सिंह, माजी पंतप्रधान पी.व्ही. नरसिंह राव, बिहारचे माजी मुख्यमंत्री कर्पूरी ठाकूर आणि कृषी शास्त्रज्ञ डॉ. एमएस स्वामीनाथन यांचा समावेश आहे. राष्ट्रपती भवनात चारही व्यक्तींच्या कुटुंबीयांना हा सन्मान स्वीकारला. नरसिंह राव यांचे पुत्र पीव्ही प्रभाकर राव, चौधरी चरण सिंह यांचे नातू जयंत चौधरी, कर्पूरी ठाकूर यांचा मुलगा रामनाथ ठाकूर आणि एमएस स्वामीनाथन यांची कन्या नित्या राव यांनी राष्ट्रपतींकडून हा सन्मान स्वीकारला.
