वंदना वेदपाठक, इंडिया दर्पण ऑनलाईन डेस्क
बॉलिवूड अभिनेता अजय देवगणचा ‘मैदान’ हा चित्रपट लवकरच प्रदर्शित होणार असून नुकतेच या चित्रपटातील गाणं रिलीज झाले आहे. टीम इंडिया है हम असे या गाण्याचे बोल आहेत. गेल्या अनेक वर्षांपासून हा चित्रपट रखडला होता, त्यामुळे आता या चित्रपटाची चाहत्यांमध्ये उत्सुकता आहे.
भारतीय फुटबॉल संघासह ज्यांनी अविस्मरणीय इतिहास रचला अशा प्रशिक्षक सय्यद अब्दुल रहीम यांच्या वास्तविक जीवनातील कथा ‘मैदान’मधून पाहायला मिळणार आहे. भारताला गौरव मिळवून देण्यासाठी आपलं जीवन समर्पित करणाऱ्या सर्व क्रीडापटूंना हे गाणं समर्पित आहे.
प्रत्येक भारतीय खेळाडू जेव्हा तिरंग्याचे प्रतिनिधित्व करतो तेव्हा त्या भावना आणि त्याचा जोश पाहण्यासारखा असतो. अशी भावना जी संपूर्ण राष्ट्राला त्यांच्यासाठी जल्लोषात एकत्र आणते. ‘टीम इंडिया हैं हम’ हे गाणं संगीतकार ए.आर. रहमान आणि नकुल अभ्यंकर यांनी गायले आहे. मनोज मुंतशिर, स्लो चीता आणि दविंदर सिंग यांनी मैदानमधील गाणी लिहीली आहेत. हा चित्रपट ईद २०२४ म्हणजेच १० एप्रिल रोजी जगभरातील चित्रपटगृहांमध्ये प्रदर्शित होणार आहे. ‘मैदान’ सिनेमात अभिनेत्री प्रियामणी, गजराज राव आणि बंगाली अभिनेता रुद्रनील घोष देखील आहेत.
https://youtu.be/-6AWhtDKkHA?si=mrjv45JzaSRJWUs-
