नाशिक (इंडिया दर्पण वृत्तसेवा) – शहरातील वेगवेगळया भागात मंगळवारी पार्क केलेल्या दोन कारच्या काचा फोडून चोरट्यांनी सुमारे पावणे दोन लाखाचा ऐवज चोरून नेला. त्यात लॅपटॉप आयपॅड,घड्याळ व रोकडचा समावेश आहे. याप्रकरणी गंगापूर आणि मुंबईनाका पोलीस ठाण्यात गुन्हे दाखल करण्यात आले आहेत.
पोलीसांनी दिलेल्या माहितीनुसार पहिली घटना गंगापूररोड भागात घडली. तुषार प्रकाश भागवत (रा.पांगरेमळा,सिडको) यांनी याबाबत फिर्याद दिली आहे. भागवत यांच्या मित्राची किया कार मंगळवारी सायंकाळच्या सुमारास गंगापूररोडवरील केबीटी सर्कल भागात पार्क केलेली असतांना ही घटना घडली. बँक ऑफ बडोदा परिसरात लावलेल्या कारची काच फोडून चोरट्यांनी सिटावर ठेवलेली लॅपटॉप बॅग चोरून नेली. या बॅगेत आय पॅड,अ‍ॅटोमॅटीक वॉच,पाकिट तसेच रोकड असा सुमारे १ लाख ३५ हजार रूपयांचा मुद्देमाल होता. अधिक तपास पोलीस नाईक बागुल करीत आहेत.
दुसरी घटना तिडके कॉलनीत घडली. याबाबत निशांत अनिल कुमार (रा.सातपूर सोमेश्वर लिंकरोड) यांनी फिर्याद दिली आहे. निशांत कुमार मंगळवारी तिडके कॉलनी भागात गेले होते. न्युरोप्लस हॉस्पिटल भागात त्यांनी आपली कार पार्क केली असता ही घटना घडली. अज्ञात चोरट्यांनी त्यांच्या गाडीची पाठीमागील काच फोडून सिटावर ठेवलेली लॅपटॉप बॅग चोरून नेली. या बॅगेत ५० हजाराचा लॅपटॉप होता. याबाबत मुंबईनाका पोलीस ठाण्यात गुन्हा दाखल करण्यात आला असून अधिक तपास हवालदार म्हैसधुणे करीत आहेत.
……
