नाशिक (इंडिया दर्पण वृत्तसेवा)– शहरातील बसस्थानकामध्ये चोरट्यांचा सुळसुळाट झाला असून बसमध्ये चढणा-या दोन प्रवाशी महिलाच्या गळयातील मंगळसुत्रासह भामट्यांनी एका महिलेच्या पर्स मधून रोकडसह दागिणे हातोहात लांबविले. दोन्ही घटनांमध्ये सुमारे लाखाचा ऐवज भामट्यांनी लांबविला असून याप्रकरणी सरकारवाडा व नाशिकरोड पोलीस ठाण्यात चोरीचे गुन्हे दाखल करण्यात आले आहेत.
पोलीसांनी दिलेल्या माहितीनुसार मोहिनी किरण मोरे व देवकाबाई शिवराम नवरे (रा. दोघी रत्नमाला सोसा. मेरी म्हसरूळ लिंक रोड) या दोघी महिला रविवारी (दि.१७) नातेवाईकांच्या अंत्यविधीस जाण्यासाठी नवीन मेळा बसस्थानकात आल्या होत्या. नाशिक मालेगाव बसमध्ये दोन्ही महिला चढत असतांना ही घटना घडली. अज्ञात चोरट्यांनी गर्दीची संधी साधत दोघींच्या गळय़ातील सुमारे ४७ हजार रूपये किमतीचे मंगळसूत्र चोरून नेले. याप्रकरणी सरकारवाडा पोलीस ठाण्यात एकत्रीत गुन्हा दाखल करण्यात आला असून अधिक तपास हवालदार साबळे करीत आहेत.
दुसरी घटना नाशिकरोड बसस्थानकात घडली. याबाबत पुजा शरद बोडके (रा.जामगाव पास्ते ता. सिन्नर) यांनी फिर्याद दाखल केली आहे. बोडके या बुधवारी (दि.२०) माळे दुमाळे ता. दिंडोरी येथे माहेरी जाण्यासाठी नाशिकरोड बसस्थानकात आल्या होत्या. नाशिकरोड ते सिबीएस प्रवासासाठी त्या शहर बसमध्ये चढत असतांना ही घटना घडली. अज्ञात चोरट्यांनी गर्दीची संधी साधत त्यांच्या पर्सची चैन उघडून छोटे पाकिट चोरून नेले. या पाकिटात रोख रक्कम व सोन्याचांदीचे दागिणे असा सुमारे ४८ हजाराचा ऐवज होता. याबाबत नाशिकरोड पोलीस ठाण्यात गुन्हा दाखल करण्यात आला असून अधिक तपास हवालदार खैरे करीत आहेत.
