वंदना वेदपाठक, इंडिया दर्पण वृत्तसेवा
महेश मांजरेकर यांचा लवकरच ‘जुनं फर्निचर’ हा चित्रपट प्रेक्षकांच्या भेटीला येणार आहे. या चित्रपटाचा टीझर नुकताच प्रदर्शित झाला आहे.
‘जुनं फर्निचर’ हा चित्रपट ७१ वर्षीय एका वृद्ध व्यक्तीच्या आयुष्यावर आधारित असल्याचे दिसत आहे. टीझरमध्ये महेश मांजरेकर “या म्हाताऱ्याला अडवूनच दाखवा!” असा डायलॉग बोलताना दिसत आहेत. त्यांचा हा डायलॉग लक्षवेधी ठरत आहे. टीझरच्या बॅकग्राऊंडला येणारा भारदस्त आवाज, दमदार व्यक्तीत्व या सर्व गोष्टी प्रेक्षकांची उत्सुकता वाढवताना दिसत आहे. एकंदरीतच या चित्रपटात आपल्या आजुबाजूला घडणाऱ्या गोष्टींवर प्रकाश टाकण्यात आला आहे.
आजकाल तरुण पिढी ही वयस्कर व्यक्तींना पाहून ‘ओल्ड फर्निचर’ असे बोलताना दिसते. पण त्यांच्या मनातील हिच भावना खोडून काढण्याचा निर्णय महेश मांजरेकरांनी घेतला आहे. या चित्रपटात मल्टीस्टारर असलेला हा एका कौटुंबिक चित्रपट असल्याचे स्पष्ट होत आहे. अनेकदा ज्येष्ठ नागरिकांना ‘जुनं फर्निचर’ असे म्हणतात. परंतु हेच जुने फर्निचर आजच्या तकलादू फर्निचरपेक्षा किती मजबूत असते, हे दाखवण्याचा प्रयत्न या चित्रपटातून केला जाणार असल्याची माहिती महेश मांजरेकर यांनी दिली आहे. ‘जुनं फर्निचर’ या चित्रपटात महेश मांजरेकर, उपेंद्र लिमये, मेधा मांजरेकर, अनुषा दांडेकर हे कलाकार दिसणार असल्याची चर्चा आहे. तसेच या चित्रपटाचे लेखन, दिग्दर्शन, पटकथा आणि संवाद हे महेश मांजरेकरांचे आहेत. हा चित्रपट २६ एप्रिल रोजी प्रेक्षकांच्या भेटीला येणार आहे.
