इंडिया दर्पण ऑनलाईन डेस्क
वंचित बहुजन आघाडीचे नेते प्रकाश आंबेडकर यांनी काँग्रेसचे राष्ट्रीय अध्यक्ष मल्लिकार्जुन खर्गे यांना पत्र लिहले असून हे पत्र प्रचंड चर्चेत आहे. या पत्रात त्यांनी ठाकरे – पवारांवरील विश्वास उडाला असल्याचे सांगत काँग्रेसला ७ जागांवर पाठिंबा देऊ असा प्रस्ताव दिला आहे. या पत्रात आमचा मुख्य अजेंडा हा भाजपला हरवणे हा असल्याचे म्हटले आहे.
मल्लिकार्जुन खर्गे यांना लिहलेल्या पत्रात आंबेडकर यांनी म्हटले आहे की, १७ मार्च रोजी मुंबईतील भारत जोडो न्याय यात्रेच्या समपन महासमारंभात तुम्हाला आणि राहुल गांधी यांना भेटून आनंद झाला. आम्ही विस्तृत संभाषण करू शकलो नाही आणि म्हणूनच आज मी तुम्हाला पत्र लिहित आहे. निवडणुकीचे वेळापत्रक जाहीर झाले असून महाविकास आघाडी वंचित बहुजन आघाडीला कोणत्याही चर्चेसाठी किंवा बैठकीसाठी निमंत्रित न करता सातत्याने बैठका घेत आहे.
शिवसेना (उद्धव बाळासाहेब ठाकरे) आणि राष्ट्रवादी काँग्रेस पक्ष (शरदचंद्र पवार) यांनी असंख्य महाविकास आघाडी बैठकीत वंचित बहुजन आघाडीच्या प्रतिनिधींचे म्हणणे ऐकून घेण्यास नकार दिला आहे. महाविकास आघाडी मध्ये वंचित बहुजन आघाडीबद्दलच्या असमान वृत्तीमुळे आमचा या दोन्ही पक्षांवरचा विश्वास उडाला आहे.
वंचित बहुजन आघाडीचा मुख्य अजेंडा हाच फॅसिस्ट, फुटीरतावादी, अलोकतांत्रिक भाजपा-आरएसएस सरकारचा आहे. या विचाराने मी महाराष्ट्रातील ७ जागांवर भारतीय राष्ट्रीय काँग्रेसला वंचित बहुजन आघाडीचा पूर्ण पाठिंबा देण्याचा निर्णय घेतला आहे. मी तुम्हाला विनंती करतो की मला वंचित बहुजन आघाडी मध्ये भारतीय राष्ट्रीय काँग्रेसला दिलेल्या कोट्यातून ७ मतदारसंघांची नावे द्या. तुमच्या पसंतीच्या या ७ जागांवर तुमच्या पक्षाच्या उमेदवारांना आमचा पक्ष पूर्ण मैदानी आणि धोरणात्मक पाठिंबा देईल. वंचित बहुजन आघाडीकडून भारतीय राष्ट्रीय काँग्रेसला दिलेला हा प्रस्ताव केवळ सदिच्छाच नाही तर भविष्यात संभाव्य आघाडीसाठी मित्रत्वाचा विस्तारही आहे.
आता या पत्रावर काँग्रेस नेमकं काय उत्तर देते हे महत्त्वाचे आहे. दरम्यान या पत्रातून वंचितने महाविकास आघाडीतून आम्ही वेगळे होत असल्याचेही संकेत दिले आहे. त्यामुळे आता वंचित स्वतंत्रपणे निवडणुकीला सामोरे जाणार आहे.
