इंडिया दर्पण ऑनलाईन डेस्क
गेल्या काही दिवसांपासून महायुतीत मनसे असणार असल्याचे बोलले जात होते. आज त्यावर शिक्कामोर्तब होण्याची शक्यता आहे. मनसे अध्यक्ष राज ठाकरे चार्टड विमानाने दिल्लीला रवाना झाले आहेत. पण, नाशिकमध्ये भाजप व शिंदे गटाची धडधड वाढली आहे. महायुतीमध्ये मनसेचा समावेश झाला तर ते किमान दोन जागा मागू शकतात. त्यात दक्षिण मुंबईची व नाशिकची जागा मागितली जाणार असल्याचे बोलले जात आहे. त्यामुळे ही धडधड वाढली आहे.
अगोदरच नाशिक लोकसभेच्या जागेवर भाजप, शिंदे गट व राष्ट्रवादीच्या अजित पवार गटाने दावा ठोकला आहे. त्यात आता मनसेची भर पडणार आहे. दक्षिण मुंबईत मनसे भाजपच्या चिन्हावर निवडणूक लढवणार असल्याची चर्चा आहे. येथे बाळा नांदगावकर यांना उभे केले जाणार आहे. पण, मनसे नाशिकची जागा चिन्हावर लढण्यासाठी मागू शकतात. नाशिकवर राज ठाकरे यांचे विशेष प्रेम आहे. त्यामुळे ते या जागेवर दावा करु शकतात. असे झाले तर तिघांचे भांडण व चौथ्याला लाभ असे होणार आहे.
आज शिक्कामोर्तब होणार
आज केंद्रीय गृहमंत्री अमित शाह यांच्यासोबत महायुतीत सहभागी होण्याबाबत चर्चा करण्यासाठी ते दिल्लीला रवाना झाल्याचे बोलले जात आहे.
भाजपचे प्रदेशाध्यक्ष चंद्रशेखर बावनकुळे आणि देवेंद्र फडणवीस हे सुद्धा दिल्लीत असल्याची माहिती मिळत आहेत. आगामी लोकसभा निवडणुकीत मनसेला महायुतीत घेण्यासाठी गेल्या काही दिवसांपासून हालचाली सुरु होत्या. आता त्या अंतिम टप्यात असल्याचे बोलले जात आहे. त्यात या दोन जागेवर शिक्कामोर्तब शक्यता आहे.
