नाशिक (इंडिया दर्पण वृत्तसेवा)– गांधीनगर जवळील राहूल नगर कॉर्नर भागात कुठलेही कारण नसतांना दोघांनी एका तरूणास बेदम मारहाण केल्याची घटना घडली. या घटनेत धारदार शस्त्राचा वापर करण्यात आल्याने २७ वर्षीय युवक गंभीर जखमी झाला असून त्याच्यावर उपचार सुरू आहेत. याप्रकरणी उपनगर पोलीस ठाण्यात जीवे मारण्याचा प्रयत्न केल्याप्रकरणी गुन्हा दाखल करण्यात आला आहे.
गौरव सारोटे व सौरव सारोटे अशी युवकास मारहाण करणा-या संशयितांची नावे आहेत. याबाबत सागर राम सदावर्ते (२७ रा.गरूड चाळ,राहूलनगर,आगरटाकळी गांधीनगर) या युवकाने फिर्याद दिली आहे. सदावर्ते गुरूवारी (दि.१४) रात्रीच्या सुमारास गांधीनगर भागातील राहूल कॉर्नर येथून आपल्या घराकडे पायी जात असतांना दोघा संशयितांनी त्यास गाठले. यावेळी संतप्त दोघांनी कुठलेही कारण नसतांना त्यास शिवीगाळ व दमदाटी करीत लाथाबुक्यांनी बेदम मारहाण केली.
या घटनेत एकाने धारदार शस्त्राने वार केल्याने सदावर्ते जखमी झाला असून अधिक तपास उपनिरीक्षक पवार करीत आहेत.
