इंडिया दर्पण ऑनलाईन डेस्क
प्रसिध्द गायिका अनुराधा पौडवाल यांनी आज दिल्लीत भाजपमध्ये प्रवेश केला. लोकसभा निवडणुकीच्या धामधुमीत त्यांनी हा प्रवेश केल्यामुळे त्या कोणत्या मतदार संघातून उमेदवारी करणार शी चर्चा सुरु झाली आहे.
अनुराधा पौडवाल यांचा जन्म मुंबईत झाला असून त्यांचे माहेरचे नाव अलका नाडकर्णी आहे. त्यांनी मराठीसह हिंदी, तमिळ, उडिया, नेपाळी इत्यादी भाषांतील चित्रपटांतूनही पार्श्वगायन केले आहे. १९७३ सालच्या अभिमान नावाच्या हिंदी चित्रपटातील एका संस्कृत श्लोकाच्या गायनातून यांचे पार्श्वगायन क्षेत्रात पदार्पण झाले. त्याच वर्षी प्रदर्शित झालेल्या यशोदा या मराठी चित्रपटाद्वारे प्रमुख पार्श्वगायिकेच्या रूपात त्यांची कला प्रथमच श्रोत्यांसमोर आली. तेव्हापासून आतापावेतो सुमारे चार दशके चित्रपटगीते, भावगीते व भजनांच्या ध्वनिमुद्रिकांच्या माध्यमांतून या गायन करीत आहेत. दिवंगत संगीतकार अरुण पौडवाल हे अनुराधा यांचे पती होते. गायिका कविता पौडवाल या त्यांच्या कन्या आणि आदित्य पौडवाल हे सुपुत्र.
