नाशिक (इंडिया दर्पण वृत्तसेवा) – पलंगावर झोपलेल्या महिलेच्या गळयातील सोन्याचे गंठण चोरट्यांनी हातोहात लांबविले. खिडकीत हात घालून भामट्यांनी ही चोरी केली असून याप्रकरणी इंदिरानगर पोलीस ठाण्यात चोरीचा गुन्हा दाखल करण्यात आला आहे.
छाया विजय बावकर (रा. विठ्ठल मंदिराजवळ, राजीवनगर) यांनी याबाबत फिर्याद दिली आहे. बावकर बुधवारी (दि.१३) आपल्या राहत्या घरातील बेडरूममध्ये झोपलेल्या असतांना ही घटना घडली. अज्ञात चोरट्यांनी खिडकीत हात घालून पलंगावर झोपलेल्या बावकर यांच्या गळयातील सुमारे ६२ हजार रूपये किमतीचे गंठण हातोहात लांबविले. अधिक तपास जमादार साळी करीत आहेत.
इंजिनीअरींगचे शिक्षण घेणारा अल्पवयीन मुलगा बेपत्ता
नाशिक (इंडिया दर्पण वृत्तसेवा) – इंजिनीअरींगचे शिक्षण घेणारा अल्पवयीन मुलगा मंगळवार (दि.१२) पासून बेपत्ता आहे. सामनगाव येथील पॉलीटेक्नीक कॉलेज येथे जात असल्याचे सांगून तो घराबाहेर पडला होता. मात्र अद्याप तो परतला नाही त्याचे कुणी तरी अपहरण केल्याचा संशय व्यक्त होत असून याबाबत सातपूर पोलीस ठाण्यात अपहरणाचा गुन्हा दाखल करण्यात आला आहे.
मानस दगडू चौधरी (रा.सातपूर कॉलनी) असे बेपत्ता युवकाचे नाव आहे. मानस चौधरी मंगळवारी (दि.१२) सकाळी सामनगाव पॉलीटेक्नीक महाविद्यालयात जात असल्याचे सांगून घराबाहेर पडला होता. मात्र तो अद्याप घरी परतला नाही. सर्वत्र शोध घेवूनही तो मिळून न आल्याने कुटूंबियांनी त्याचे कुणीतरी अपहरण केल्याचा संशय व्यक्त केला आहे. अधिक तपास जमादार नळकांडे करीत आहेत.
