नाशिक (इंडिया दर्पण वृत्तसेवा)- मेनरोड भागात व्यावसायीक स्पर्धेतून तीन जणांच्या टोळक्याने एकास बेदम मारहाण केल्याची घटना घडली. या घटनेत लोखंडी रॉड डोक्यात मारण्यात आल्याने व्यावसायीक जखमी झाला आहे. याप्रकरणी भद्रकाली पोलीस ठाण्यात गुन्हा दाखल करण्यात आला आहे.
शिवा चव्हाण व त्याचे दोन साथीदार अशी गुन्हा दाखल करण्यात आलेल्या संशयितांची नावे आहेत. याबाबत श्याम बापू अभंग (४२ रा. डिंगर अळी संभाजी चौक जुने नाशिक) यांनी फिर्याद दिली आहे. अभंग मेनरोड भागात पिशव्या विक्रीचा व्यवसाय करतात बुधवारी (दि.१३) सकाळी त्यांनी परिसरातील मोसंबी मार्केटच्या गेट समोर आपले दुकान मांडले असता ही घटना घडली.
संशयित त्रिकुटाने त्यांना गाठून येथे दुकान लावू नको या कारणातून वाद घातला. यावेळी अभंग यांनी का दुकान लावायचे नाही याबाबत जाब विचारला असता संतप्त त्रिकुटाने त्याना शिवीगाळ व दमदाटी करीत लाथाबुक्यांनी बेदम मारहाण केली. या घटनेत शिवा चव्हाण याने लोखंडी रॉडने मारहाण केल्याने ते जखमी झाले असून अधिक तपास हवालदार बोंबले करीत आहेत.
