इंडिया दर्पण ऑनलाईन डेस्क
जळगावः बारामतीप्रमाणेच रावेरमध्येही नणंद-भावजयीत लढत होण्याची शक्यता आहे. भाजपने पुन्हा एकदा रक्षा खडसे यांना तिस-यांदा उमेदवारी दिल्यामुळे राष्ट्रवादीत असलेल्या नणंद रोहिणी खडसे यांना उमेदवारी मिळण्याची शक्यता आहे. त्यामुळे बारामती प्रमाणे रावेर लोकसभा मतदार संघातही नणंद- भावजयतीत सामना रंगणार आहे.
दरम्यान उमेदवारी जाहीर झाल्यानंतर खा. रक्षा खडसे यांनी सांगितले की, आता समोर सासरे असो की नणंद पूर्ण ताकदीने आम्ही मैदानात उतरणार आहे. पक्षाने माझ्यावर विश्वास दाखवला आहे. मी कुठेही कमी पडणार नाही. उमेदवारी जाहीर झाल्यानंतर नाथाभाऊ आणि घरातील सर्वांनी मला शुभेच्छा दिल्याचेही त्यांनी म्हटले. पक्षाचे नेते देवेंद्र फडणवीस, गिरीश महाजन यांनी शुभेच्छा दिल्याचेही त्यांनी सांगितले.
रोहिणी खडेस यांना उमेदवारी देण्याबाबत चर्चा
भाजपने रावेरमध्ये उमेदवार जाहीर केल्यानंतर राजकीय घडामोडींना वेग आला आहे. महाविकास आघाडीत रावेरची जागा शरद पवार गटाला मिळण्याची शक्यता आहे. रावेर लोकसभा मतदारसंघाबाबत रात्री उशिरापर्यंत शरद पवार,एकनाथ खडसे आणि रोहिणी खडसे यांच्यात चर्चा झाली. रावेर लोकसभा मतदारसंघात कुणाला उमेदवारी द्यायची यावर मंथन झाले. रक्षा खडसे एकनाथ खडसे यांच्या सून असल्याने महाविकास आघाडीकडून खडसे यांच्या कन्या रोहिणी खडसे यांना उमेदवारी देण्याबाबत चर्चा झाल्याचे सांगितले जाते.
