नाशिक (इंडिया दर्पण वृत्तसेवा)- छत्रपती संभाजीनगर मार्गावरील निलगीरीबाग भागात पाण्याच्या टाकीवरून पडल्याने ३५ वर्षीय व्यक्तीचा मृत्यू झाला. याप्रकरणी आडगाव पोलीस ठाण्यात मृत्यूची नोंद करण्यात आली आहे. सदाशिव सिताराम वाघमारे असे मृत व्यक्तीचे नाव आहे.
वाघमारे गुरूवारी (दि.७) रात्री आपल्या राहत्या इमारतीच्या पाण्याच्या टाकीवर चढत असतांना ही घटना घडली. पाय घसरून पडल्याने त्याच्या तोंडास गंभीर दुखापत झाली होती. भाऊ महादू वाघमारे यांनी त्यास तात्काळ जिल्हा रूग्णालयात दाखल केले असता वैद्यकीय सुत्रांनी तपासून मृत घोषीत केले. अधिक तपास हवालदार जाधव करीत आहेत.
……
कारागृहात कैद्याने केली आत्महत्या
नाशिक (इंडिया दर्पण वृत्तसेवा)- नाशिकरोड मध्यवर्ती कारागृहात एका कैद्याने आत्महत्या केल्याची घटना घडली. या घटनेनी कारागृहातील सुरक्षा ऐरणीवर आली असून याप्रकरणी नाशिकरोड पोलीस ठाण्यात मृत्यूची नोंद करण्यात आली आहे.
सौरभ राजू ढगे (२७ रा.सुतारगल्ली,मामलेदार चौक निफाड) असे मृत कैद्याचे नाव आहे. ढगे हा कारागृहातील न्यायबंदी कैदी असून त्यास स्वतंत्र विभागातील रूम नं. १७६ मध्ये ठेवण्यात आले होते. शुक्रवारी (दि.८) पहाटेच्या सुमारास त्याने अज्ञात कारणातून दरवाजाच्या चौकटीस टॉवेल बांधून गळफास लावून घेतला होता.
ही बाब निदर्शनास येताच प्रशासनाने तात्काळ डॉ. निळकंठ ससाणे यांना घटनास्थळी पाचारण केले असता त्यांनी तपासून त्यास मृत घोषीत केले. याबाबत शिपाई दिलीप सोनार यांनी दिलेल्या खबरीवरून पोलीस दप्तरी मृत्यूची नोंद करण्यात आली असून अधिक तपास उपनिरीक्षक माळी करीत आहेत.
