निफाड (इंडिया दर्पण वृत्तसेवा) – निफाड येथील एका युवकाने व्हाट्सअप या सोशल मीडियाच्या मंचावर निफाडचे विद्यमान आमदार दिलीपराव बनकर यांच्या विरोधात आक्षेपार्ह मजकूर प्रसिद्ध करून त्यांची बदनामी केल्या प्रकरणी निफाड पोलीस ठाण्यात गुन्हा नोंद करण्यात आला आहे. याप्रकरणी संबंधित आरोपीस पोलिसांनी ताब्यात घेतले आहे.
याबाबत मिळालेला अधिक माहितीनुसार निफाड येथील ३० वर्षीय तरुण, समाधान अशोक कुंभार्डे याने ‘निफाडचे राजकारण’ या व्हाट्सअप ग्रुप वर निफाडचे विद्यमान आमदार दिलीपराव बनकर यांच्या बद्दल – दोन वेळा गद्दारी करतो आणि तालुक्यात बॅनर लावतो” अशा आशयाचा आक्षेपार्ह मजकूर प्रसरित करून आमदार बनकर यांची बदनामी केल्याने भारतीय दंड विधान कायदा कलम ५०० अन्वये निफाड पोलीस ठाण्यात संशयित आरोपी विरुद्ध गुन्हा दाखल करण्यात आला असून आरोपीकडून असे कृत्य पुन्हा घडू नये यासाठी कलम १५१ नुसार प्रतिबंधात्मक कारवाई म्हणून त्यास अटक करण्यात आली असल्याचे पोलिसांनी सांगितले.
