नाशिक (इंडिया दर्पण वृत्तसेवा)- दिंडोरीरोडवरील पंचवटी भाजी मार्केट यार्ड भागात भरधाव अज्ञात वाहनाने दिलेल्या धडकेत अनोळखी पादचारी ठार झाला. याप्रकरणी पंचवटी पोलीस ठाण्यात अपघाताची नोंद करण्यात आली आहे.
पोलीसांनी दिलेल्या माहितीनुसार ४० ते ५० वयोगटातील अनोळखी पादचारी बुधवारी (दि.६) निमाणीकडून दिंडोरीरोडने पायी जात असतांना पाठीमागून भरधाव वेगात जाणाऱ्या अज्ञात वाहनाने त्यास धडक दिली. या अपघातात जखमी झालेल्या अनोळखीचा जागीच मृत्यू झाला असून वाहनचालक आपल्या वाहनासह पसार झाला आहे.
याबाबत पोलीस नाईक अनिल मोरे यांनी दिलेल्या फिर्यादीवरून अपघाताची नोंद करण्यात आली असून अधिक तपास उपनिरीक्षक माळी करीत आहेत.
