नाशिक (इंडिया दर्पण वृत्तसेवा)- सातपूर लिंकरोड भागात इलेक्ट्रीक दुकान फोडून चोरट्यांनी एलसीडी टिव्हीसह संगणक व साहित्य असा सुमारे ४० हजाराचा ऐवज चोरून नेला. याप्रकरणी अंबड पोलीस ठाण्यात घरफोडीचा गुन्हा दाखल करण्यात आला आहे. गोपाल रविंद्र मोरे (रा.पंडीतनगर,सिडको) यांनी फिर्याद दिली आहे. मोरे यांचे सातपूर लिंकरोडवरील इंडियन ऑईल पेट्रोलपंप भागात दुकान आहे.
गुरूवारी (दि.२९) रात्री अज्ञात चोरट्यांनी या दुकानाचे पाठीमागील दरवाजा उचकटून दुकानातील एलसीडी टिव्ही,दोन कॅम्प्युटर,मोबाईल टॅब,किबोर्ड व माऊस तसेच गल्यातील रोकड असा सुमारे ३८ हजार २०० रूपयांचा ऐवज चोरून नेला. अधिक तपास हवालदार चव्हाण करीत आहेत.
युवकाचा मोबाईल हिसकावला
नाशिक (इंडिया दर्पण वृत्तसेवा)- मुक्तीधाम परिसरात पावभाजी सेंटरवर काम करणा-या तरूणास धमकावित दुचाकीस्वार टोळक्याने त्याचा मोबाईल बळजबरीने हिसकावून नेल्याची घटना घडली. याप्रकरणी उपनगर पोलीस ठाण्यात चार जणांविरूध्द जबरीचोरीचा गुन्हा दाखल करण्यात आला आहे.
कृष्णा सर्पजीत रावत (२२ रा.जयभवानीरोड) या युवकाने फिर्याद दिली आहे. रावत मुक्तीधाम परिसरातील साईनाथ पावभाजी सेंटरवर वेटर म्हणून कामास आहे. गुरूवारी (दि.२९) रात्री तो पावभाजी सेंटरवर सेवा बजावत असतांना ही घटना घडली.
पावभाजी सेंटर समोरील रस्ता ओलांडून तो नाशिकरोडकडे जाणा-या मार्गावर ऑर्डर देण्यासाठी गेला असता दोन अ‍ॅक्टीव्हा दुचाकीवरील चार जणांच्या टोळक्याने त्याची वाट अडविली. यावेळी टोळक्याने त्यास शिवीगाळ व दमदाटी करीत धमकावत त्याच्या खिशातील सुमारे १५ हजार रूपये किमतीचा मोबाईल बळजबरीने काढून घेत पोबारा केला. अधिक तपास सहाय्यक निरीक्षक सुयोग वायकर करीत आहेत.
