नाशिक (इंडिया दर्पण वृत्तसेवा) – फुलेनगर भागात एकतर्फी प्रेमातून २४ वर्षीय तरूणावर प्राणघातक हल्ला करण्यात आल्याची घटना घडली. मोबाईलवर फोन करतो या वादातून युवतीसह एकाने हा हल्ला केला असून, यात धारदार शस्त्राचा वापर करण्यात आल्याने युवक गंभीर जखमी झाला आहे. याप्रकरणी पंचवटी पोलीस ठाण्यात जीवे मारण्याचा प्रयत्न केल्याप्रकरणी गुन्हा दाखल करण्यात आला असून दोघांना अटक करण्यात आली आहे. तर युवतीच्या तक्रारीवरून जखमी युवकावर विनयभंगाचा गुन्हा दाखल करण्यात आला आहे.
अमन सलीम सय्यद व कावेरी जगताप अशी अटक करण्यात आलेल्या संशयितांची नावे आहेत. या घटनेत प्रकाश विजय सावंत (२४ रा.फुलेनगर) हा युवक जखमी झाला आहे. भराडवाडी भागात राहणारे दिनकर सावंत यांनी दिलेल्या फिर्यादीनुसार संशयितांनी शुक्रवारी (दि.१) दुपारी प्रकाश सावंत यास मायको दवाखान्याजवळील समाजमंदिर भागात गाठून मला फोन का करतो या कारणातून वाद घालत शिवीगाळ व मारहाण केली. यावेळी संतप्त दोघांनी प्रकाश याच्यावर धारदार शस्त्राने वार केले.
या घटनेत प्रकाश सावंत हा गंभीर जखमी झाला असून, त्याच्यावर उपचार सुरू आहे. दोघा संशयितांना पोलीसांनी अटक केली आहे. तर संशयित युवतीने दिलेल्या तक्रारीनुसार मला तुझ्याशी प्रेम करायचे आहे असे फोनवर बोलून जखमी संशयिताने विनयभंग केल्याचे म्हटले आहे. याबाबत परस्परविरोधी गुन्हा दाखल करण्यात आला असून अधिक तपास सहाय्यक निरीक्षक पडोळकर व उपनिरीक्षक पाटील करीत आहेत.
