नाशिक (इंडिया दर्पण वृत्तसेवा)- आनंदवली परिसरातील पाईपलाईन रोड भागात कामावरून काढल्याने नोकराने एका मालकावर धारदार शस्त्राने हल्ला केल्याची घटना घडली. या घटनेत मालक गंभीर जखमी झाला असून याप्रकरणी गंगापूर पोलीस ठाण्यात गुन्हा दाखल करण्यात आला आहे.
मनिष दौलत भुजबळ (रा.फुलेनगर,पंचवटी) असे मालकावर हल्ला करणा-या संशयित नोकराचे नाव आहे. याबाबत राज संतोष नाठे (रा.वैशालीनगर पेठरोड) यांनी फिर्याद दिली आहे. संशयित व फिर्यादी एकमेकांचे परिचीत असून नाठे यांच्याकडे संशयित कामास होता. गेल्या महिन्यात नाठे यांनी भुजबळ यास कामावरून काढल्याने हा हल्ला झाला.
संतप्त संशयिताने गुरूवारी (दि.२९) दुपारच्या सुमारास नाठे यांना पाईप लाईन रोडवरील कोटक महिंद्रा बँक भागात गाठून हा हल्ला केला. कामावरून काढल्याचा राग मनात धरून संशयितांने नाठे यांना शिवीगाळ व दमदाटी करीत त्यांच्यावर धारदार शस्त्राने हल्ला केला. या घटनेत नाठे जखमी झाले असून अधिक तपास पोलीस नाईक हिंडे करीत आहेत.
