निफाड (इंडिया दर्पण वृत्तसेवा) – तालुक्यातील चांदोरी येथे चोरी करुन पळून जाणा-या सराईत चोराला नागरिकांच्या मदतीने पोलिसांनी फिल्मी स्टाईलने अटक केली. येथील शेतकरी शिवाजी भोर व कुटुंब शेतामध्ये दुपारी काम करत असताना संधीचा फायदा घेऊन छत्रपती संभाजी नगर जिल्ह्यातील भाबरगाव येथील सराईत चोर गोरख चव्हाण याने ही चोरी केली केली होती.
या चोराने घराचे कुलूप तोडून कपाटातील १० तोळे सोन्याची दागिने व ३० हजार रुपये रोख रक्कम असा एकूण ३ लाख ३६ हजार ५०० रुपयांचा ऐवज चोरला. त्याचवेळी घरातील महिला शेतातून घरी आल्या. त्यानंतर या चोराने त्यांना धारदार शस्त्राचा धाक दाखवून मोटरसायकलवरून पळण्याच्या तयारी केली. पण, या महिलांनी आरडाओरडा केल्यानंतर तो उसाच्या शेतात जाऊन लपला.
या घटनेची माहिती स्थानिक आपत्ती व्यवस्थापन टीम व पोलिसांना मिळताच ते घटनास्थळी दाखल होऊन नागरिकांच्या मदतीने संपूर्ण ऊसाला शेताला घेराव घातला. त्यानंतर फिल्मी स्टाईलने त्याचा शोध घेऊन तीन तासाच्या अथक प्रयत्नानंतर या चोराला पकण्यात आले. दरम्यान पोलीस कर्मचारी अनिल गडाख यांच्यावर धारदार शस्त्राने हल्ला करण्याचा प्रयत्न या चोराने केला.
