इंडिया दर्पण ऑनलाईन डेस्क
अमरावतीः सिमेंट कॉंक्रिट मिक्सर आणि मिनी बसच्या धडकेत चार क्रिकेटपटूंचा बळी गेला, तर दहा जण जखमी झाले. अमरावतीतील नांदगाव-खंडेश्वर रस्त्यावर हा अपघात झाला.
अमरावती येथील खेळाडू यवतमाळमध्ये सुरू असलेल्या क्रिकेट स्पर्धेसाठी मिनी बसमधून निघाले होते. नांदगाव खंडेश्वर मार्गे यवतमाळला जात असताना ही बस व काँक्रीट मिक्सर ट्रकची धडक झाली. त्यात चार खेळाडूंचा घटनास्थळीच मृत्यू झाला, तर दहा जखमी झाले. अपघातात दोन्ही वाहनांचे मोठे नुकसान झाले.
पोलिसांनी घटनास्थळी धाव घेतली. जखमी नागरिकांना नांदगाव खंडेश्वर येथील तालुका आरोग्य केंद्रात उपचारासाठी दाखल करण्यात आले आहे. तिथे काहींवर तर गंभीर जखमींवर अमरावती येथे उपचार सुरू आहेत. अमरावती जिल्ह्यातून हे खेळाडू यवतमाळ पोचण्यापूर्वीच या खेळाडूंवर काळाने घाला घातला. या अपघातातील मृतांच्या नावे समजू शकली नाहीत. अपघातानंतर बराच वेळ वाहतुकीची कोंडी झाली होती.
