नाशिक (इंडिया दर्पण वृत्तसेवा) – नाशिकमध्ये पुन्हा वाहनांची तोडफोड केल्याचा प्रकार समोर आला आहे. रात्री चार वाजेच्या सुमारास १२ वाहनांची तोडफोड करण्यात आली आहे. श्रमिकनगर येथील सात माऊली चौक शनी चौक परिसरात हा प्रकार घडला. परिसरात दहशत निर्माण करण्यासाठी टवाळखोरांनी हे कृत्य केले. या घटनेमुळे परिसरात संताप व्यक्त केला जात आहे.
या घटनेबाबत समजेलली माहिती अशी की, महानगरपालिकेच्या प्रभाग क्रमांक ९ श्रमिकनगर मधील रहिवासी हेमंत शिरसाठ, संजय देशमुख, दिपक महाले आदिसह सुमारे डझनभर नागरिकांच्या वाहनांची पहाटे काही समाजकंटाकडून तोडफोड करण्यात आली. घटनास्थळी भारतीय जनता युवा मोर्चा शहर सरचिटणीस अमोल दिनकर पाटील, सातपुर पोलीस स्टेशनचे वरिष्ठ पोलीस निरीक्षक रणजित नलावडे उपनिरीक्षक राठोड समवेत संबंधित अधिकाऱ्यांनी पाहणी केली.
या घटनेबाबत हेमंत शिरसाठ यांनी सांगितले की, पहाटे चार च्या दरम्यान काही तरूणांनी गाड्यांची तोडफोड केली गल्लीत दिसेल त्या वाहनावर लक्ष करत एक प्रकारे दहशत निर्माण करण्याचा प्रयत्न केला आहे. पोलिस प्रशासनाने संबंधितावर कडक कारवाई करावी अशी मागणी त्यांनी केली.
