नाशिक (इंडिया दर्पण वृत्तसेवा) – त्र्यंबकरोड वरील ठक्कर डोम भागात रस्त्याने पायी जाणा-या वृध्देच्या गळयातील सोन्याची पोत दुचाकीस्वारांनी ओरबाडून नेल्याची घटना घडली. या घटनेत ६० हजार रूपये किमतीची पोत भामट्यांनी लांबविली असून याप्रकरणी गंगापूर पोलीस ठाण्यात जबरीचोरीचा गुन्हा दाखल करण्यात आला आहे.
निर्मला प्रकाश चोरडिया (७० रा.पटेल कॉलनी,दूध डेअरी समोर त्र्यंबकरोड) यांनी फिर्याद दिली आहे. चोरडिया गुरूवारी (दि.१५) दुपारी जेवण आटोपून पाय मोकळे करण्यासाठी घराबाहेर पडल्या होत्या.
ठक्कर डोम परिसरातून त्या रस्त्याने पायी जात असताना एबीबी सर्कल कडून मोपेड दुचाकीवर आलेल्या भामट्याने त्यांच्या गळयातील सुमारे ६० हजार रूपये किमतीची दोन तोळे वजनाची सोन्याची पोत ओरबाडून नेली. अधिक तपास उपनिरीक्षक पाटील करीत आहेत.
