नाशिक (इंडिया दर्पण वृत्तसेवा)- शहरात मंगळवारी वेगवेगळया ठिकाणी झालेल्या अपघातांमध्ये दोन दुचाकीस्वारांचा मृत्यू झाला. याबाबत सातपूर आणि आडगाव पोलीस ठाण्यात मृत्यूच्या नोंदी करण्यात आल्या आहेत.
पहिला अपघात लाखलगाव येथे झाला. निवृत्ती हरिभाऊ जाधव (८६ रा.लाखलगाव) हे गेल्या सोमवारी (दि.५) सायंकाळच्या सुमारास लाखलगावकडून आपल्या शेताच्या दिशेने जात असतांना दुचाकीस अपघात झाला होता. या अपघातात गंभीर दुखापत झाल्याने त्यांना आडगाव मेडिकल कॉलेज येथे दाखल केले असता मंगळवारी (दि.१३) उपचार सुरू असतांना डॉ. शुभम मिसाळ यांनी त्यांना तपासून मृत घोषीत केले. याबाबत आडगाव पोलीस ठाण्यात मृत्यूची नोंद करण्यात आली असून अधिक तपास हवालदार डापसे करीत आहेत.
दुस-या अपघातात सतिष भिकन बोरसे (३५ रा.अशोकनगर सातपूर) हे गेल्या शनिवारी (दि.१०) रात्री एक्स्लो पॉईंटकडून अशोकनगरच्या दिशेने आपल्या दुचाकीवर प्रवास करीत असतांना झाला होता. सातपूर अंबड लिंकरोडवरील दत्त मंदिर चौक परिसरात भरधाव अज्ञात वाहनाने दुचाकीस धडक दिल्याने बोरसे गंभीर जखमी झाले होते. बहिण माया पाटील यांनी त्यास तात्काळ मुंबईनाका परिसरातील शताब्दी हॉस्पिटल येथे दाखल केले होते. त्यानंतर त्यांना अधिक उपचारार्थ आडगाव मेडिकल कॉलेज येथे हलविण्यात आले असता उपचार सुरू असतांना डॉ.शरयू देशमुख यांनी त्यांना तपासून मृत घोषीत केले. याबाबत सातपूर पोलीस ठाण्यात मृत्यूची नोंद करण्यात आली असून अधिक तपास हवालदार केदारे करीत आहेत.
