नाशिक (इंडिया दर्पण वृत्तसेवा) – औद्योगीक वसाहतीतील कार्बन नाका भागात भाडेकरूची विचारपूस करण्यासाठी आलेल्या टोळक्याने घरमालकास मारहाण केल्याची घटना घडली. या घटनेत काही तरी हत्याराने मारण्यात आल्याने घरमालकास गंभीर दुखापत झाली असून याप्रकरणी सातपूर पोलीस ठाण्यात गुन्हा दाखल करण्यात आला आहे.
पोलीसांनी दिलेल्या माहितीनुसार सॅण्डी, सचिन व त्याचे दोन साथीदार अशी घरमालकास मारहाण करणा-या संशयितांची नावे आहेत. याप्रकरणी विनीत कुमार राम निरंजन सिंह (४५ रा.प्लॉट नं.२ कार्बननाका शिवाजीनगर) यांनी फिर्याद दिली आहे. विनीत सिंह रविवारी (दि.११) सायंकाळच्या सुमारास आपल्या घरात असतांना ही घटना घडली. संशयित टोळक्याने घराबाहेर येवून सिंह यांच्या भाडेकरूस जोरजोरात ओरडून आवाज देत होते. त्यामुळे सिंह यांनी भाडेकरू घरात नाहीत तुम्ही येथे आरडाओरड करू नका असे सांगितल्याने ही हाणामारी झाली.
भाडेकरूची विचारपूस करणा-या संतप्त संशयित टोळक्याने सिंह यांना शिवीगाळ व दमदाटी करीत त्यांना मारहाण केली. या घटनेत त्यांना काही तरी हत्याराने मारहाण करण्यात आल्याने ते जखमी झाले असून अधिक तपास जमादार भड करीत आहेत.
