नाशिक (इंडिया दर्पण वृत्तसेवा) – वडाळा पाथर्डी मार्गावर पती समवेत दुचाकीवर ट्रिपलसिट प्रवास करणा-या महिलेच्या गळयातील मंगळसूत्र मोटारसायकलस्वार भामट्यांनी ओरबाडून नेल्याची घटना घडली. या घटनेत सुमारे दीड लाखाचे मंगळसूत्र भामट्यांनी पळविले असून याप्रकरणी इंदिरानगर पोलीस ठाण्यात जबरीचोरीचा गुन्हा दाखल करण्यात आला आहे.
पोलीसांनी दिलेल्या माहितीनुसार शिला दिलीप कदम (रा.सोमठाणदेश ता.येवला) यांनी याबाबत फिर्याद दिली आहे. कदम या गुरूवारी (दि.१) पतीसमवेत शहरात आल्या होत्या. रात्रीच्या सुमारास त्या बहिणीच्या मुलीस सोबत घेवून पतीच्या दुचाकीवर ट्रिपलसिट प्रवास करीत असतांना ही घटना घडली.
सराफ लॉन्स कडून कदम दाम्पत्य पाथर्डी गावाच्या दिशेने प्रवास करीत असतांना पार्क साईट सोसायटी समोर पाठीमागून दुचाकीवर आलेल्या भामट्यांनी कदम यांच्या गळयातील सुमारे १ लाख ४० हजार रूपये किमतीची पट्टी पोत असलेले मंगळसुत्र ओरबाडून नेले. अधिक तपास उपनिरीक्षक सोनार करीत आहेत.
