नाशिक (इंडिया दर्पण वृत्तसेवा) – गोदाघाट भागात कुठलेही कारण नसतांना मारहाण करीत तीन जणांच्या टोळक्याने एकास लुटल्याची घटना घडली. या घटनेत खिशातील रोकडसह मोबाईल बळजबरीने काढून घेत भामट्यांनी पोबारा केला असून याप्रकरणी पंचवटी पोलिस ठाण्यात जबरीचोरीचा गुन्हा दाखल करण्यात आला आहे.
योगेश पंढरीनाथ कांगणे (३८ रा.हेडगेवार चौक,दत्तमंदिर स्टॉप सिडको) यांनी तक्रार दाखल केली आहे. कांगणे बुधवारी (दि.२४) रात्री गोदाघाटाच्या दिशेने पायी जात असतांना ही घटना घडली. हुळकर पुलाजवळ अज्ञात तीन जणांच्या टोळक्याने त्यांची वाट अडवित कुठलेही कारण नसतांना त्यांना शिवीगाळ करीत मारहाण केली.
यावेळी भामट्यांनी बळजबरीने त्यांच्या खिशातील रोकड व मोबाईल असा सुमारे ११ हजार ३०० रूपयांचा ऐवज काढून पोबारा केला. अधिक तपास सहाय्यक निरीक्षक खैरणार करीत आहेत.
महिलेच्या हातातील मोबाईल दुचाकीस्वारांनी केला लंपास
नाशिक (इंडिया दर्पण वृत्तसेवा) -वडाळापाथर्डी मार्गावरील रस्त्याने पायी जाणा-या महिलेच्या हातातील मोबाईल दुचाकीस्वार भामट्यांनी हिसकावून नेल्याची घटना जगन्नाथ चौकात घडली. याप्रकरणी इंदिरानगर पोलीस ठाण्यात जबरीचोरीचा गुन्हा दाखल करण्यात आला आहे.
श्रुती विनोद मेहरा (रा. कैलासनगर,वडाळा पाथर्डी रोड) यांनी याबाबत तक्रार दाखल केली आहे. मेहरा बुधवारी (दि.२४) रात्री शतपावलीसाठी घराबाहेर पडल्या असता ही घटना घडली. जगन्नाथ चौकातून त्या मोबाईलवर बोलत रस्त्याने पायी जात असतांना क्रेझी बर्गर दुकानासमोर ही घटना घडली.
पाठीमागून आलेल्या दुचाकीस्वारांनी त्यांच्या हातातील सुमारे दहा हजार रूपये किमतीचा मोबाईल हिसकावून नेला. अधिक तपास उपनिरीक्षक सोनवणे करीत आहेत.
