नाशिक (इंडिया दर्पण वृत्तसेवा)- बंद फार्मासिटीकल कंपनीच्या कारखान्यातील लाखोची मशिनरी व लोखंडी साहित्य नोकरानेच चोरुन नेल्याचा प्रकार समोर आला आहे. या घटनेत ४९ लाख ६५ हजार रूपये किमतीच्या मशनिरीची विल्हेवाट लावण्यात आली आहे. याप्रकरणी नाशिकरोड पोलिस ठाण्यात गुन्हा दाखल करण्यात आला आहे.
सलीम तडवी (रा.नायगावरोड,शिंदे ता.जि.नाशिक) असे संशयित नोकराचे नाव आहे. याबाबत तुषार हिरालाल गगराणी (रा.धोंगडेमळा ना.रोड) यांनी फिर्याद दिली आहे. गगराणी यांचा नायगावरोडवर सोहम ऑरगॅनिक प्रा.लि.नावाची फार्मासिटीकल कंपनी आहे. गेल्या सप्टेंबर महिन्यात कारखाना बंद पडल्याने त्यांनी विश्वासू नोकर असलेल्या संशयिताकडे कंपनीची चावी दिली असता ही घटना घडली.
संशयिताने बंद कंपनी उघडून खोलून ठेवलेल्या डिस्टीलेशन मशिनचे स्टिल व लोखंडी साहित्य असा सुमारे ४९ लाख ६५ हजाराचा ऐवज चोरून नेला. अधिक तपास हवालदार गोसावी करीत आहेत.
