नाशिक (इंडिया दर्पण वृत्तसेवा)- जुने सिबीएस भागात बसमध्ये चढतांना भामट्यांनी प्रवासी महिलेच्या गळयातील सोन्याची पोत लंपास केली. या घटनेत सुमारे ५० हजार रूपये किमतीच्या पोतीवर चोरट्यांनी डल्ला मारला आहे. याप्रकरणी सरकारवाडा पोलिस ठाण्यात चोरीचा गुन्हा दाखल करण्यात आला आहे.
कमल धनाजी बागुल (५६ रा.गणेश चौक,सिडको) यांनी याबाबत तक्रार दाखल केली आहे. बागुल या शुक्रवारी (दि.१२) बाहेरगावी जाण्यासाठी सीबीएस बसस्थानकात गेल्या असता ही घटना घडली. बसमध्ये चढत असतांना गर्दीची संधी साधत अज्ञात चोरट्यांनी त्यांच्या गळय़ातील सुमारे ५० हजार रूपये किमतीची पोत हातोहात लांबविली. अधिक तपास पोलिस नाईक लोंढे करीत आहेत.
