वंदना वेदपाठक, इंडिया दर्पण वृत्तसेवा
संपूर्ण देशात सध्या प्रभू श्रीराम मंदिराच्या प्राणप्रतिष्ठेची लगबग सुरू आहे. अवघा देश राममय झाला असून सगळीकडे फक्त रामधुन ऐकायला मिळतेय. त्यात आता श्रीराम मंदिराच्या उद्घाटनाचा मुहूर्त साधत प्रभू श्रीरामाचे हे गीत सप्तसूर म्युझिकने तयार केले आहे.
या व्हिडिओ अल्बममध्ये गायक आदर्श शिंदे यांनी त्यांच्या दमदार आवाजात ‘प्रभू श्रीराम ‘हे गीत गायले आहे. अयोध्येचा राजा आपला राम मंदिरी अवतरला असे गीताचे शब्द आहेत.
विपुल शिवलकर यांच्या गीताला ऋषी बी यांनी संगीतबद्ध केल आहे. या गाण्यात भक्तिमय वातावरणात रमलेले श्रीराम भक्त, शरयू तीरावरील आरती तसेच श्रीराम मंदिराची दृश्यं दाखवण्यात आली आहेत. त्यामुळे या भक्तीमय वातावरणाला या गाण्यामुळे अधिकच उत्साह येणार हे नक्की!
