नाशिक (इंडिया दर्पण वृत्तसेवा) – शहरात वेगवेगळया भागात राहणा-या तीन मुलीसह एक मुलगा बेपत्ता झाला आहे. सदर मुलांना कुणी तरी फूस लावून पळवून नेल्याची भिती व्यक्त होत असून पोलिस दप्तरी अपहरणाचे गुन्हे दाखल करण्यात आले आहेत.
पहिली घटना सामनगाव रोड भागात घडली. जयप्रकाश नगर भागात राहणारी मुलगी शुक्रवारी (दि.५) सायंकाळ पासून बेपत्ता आहे. तिला कुणी तरी पळवून नेल्याचा कुटूंबियांनी संशय व्यक्त केला असून याप्रकरणी नाशिकरोड पोलिस ठाण्यात गुन्हा दाखल करण्यात आला आहे. अधिक तपास उपनिरीक्षक माळी करीत आहेत. तर दुस-या घटनेत सिडकोतील माऊली लॉन्स भागात राहणारा मुलगा बुधवार (दि.३) पासून बेपत्ता आहे. त्याला कुणी तरी फुस लावून पळवून नेल्याची तक्रार पालकांनी दिली असून याप्रकरणी अंबड पोलिस ठाण्यात नोंद करण्यात आली आहे. अधिक तपास हवालदार टोपले करीत आहेत.
तिस-या घटनेत इगतपुरी येथील १७ वर्षीय मुलगी गंगापूर गावात आलेली होती. शुक्रवार (दि.५) पासून ती अचानक बेपत्ता झाली असून तिला कशाचे तरी आमिष दाखवून कुणी तरी पळवून नेल्याचा अंदाज कुटुंबियांनी वर्तविला आहे. याबाबत गंगापूर पोलिस ठाण्यात गुन्हा दाखल करण्यात आला असून अधिक तपास हवालदार सरनाईक करीत आहेत. चौथी घटना जेलरोड भागात घडली. हनुमंत नगर भागात राहणारी अल्पवयीन मुलगी गुरूवारी (दि.४) रात्रीपासून बेपत्ता आहे. तिला कुणी तरी पळवून नेल्याचा अंदाज बांधला जात आहे. याप्रकरणी उपनगर पोलिस ठाण्यात गुन्हा दाखल करण्यात आला असून अधिक तपास उपनिरीक्षक गोळे करीत आहेत.
