नाशिक (इंडिया दर्पण वृत्तसेवा) – हमालांच्या मदतीने ट्रकचालकाने सिमेंट गोण्या चोरून नेल्याचा प्रकार समोर आला आहे. ५० हजार रूपये किमतीच्या सुमारे १०० गोण्या ट्रक चालकाने चोरून नेल्याचा आरोप होत असून याप्रकरणी नाशिकरोड पोलिस ठाण्यात गुन्हा दाखल करण्यात आला आहे.
गुड्डू उर्फ आयुब पठाण नूर मोहम्मद असे संशयित ट्रक चालकाचे नाव आहे. याबाबत प्रितेश शिवनारायण सोमानी (रा.निलगिरी सोसा.दत्तमंदिर) यांनी फिर्याद दाखल केली आहे. सोमानी यांचे मालधक्का रोड भागात सिमेंट गोडावून आहे. या गोडावूनवर संशयित ट्रक चालकाचे येणे जाणे होते. त्यामुळे त्याचे गोडावून मध्ये काम करणा-या हमालांशी ओळख होती.
या ओळखीच्या माध्यमातून संशयिताने ही चोरी केल्याचा आरोप सोमानी यांनी केला आहे. शनिवारी (दि.३०) सकाळच्या सुमारास सोमानी गोडावून मध्ये नसतांना संशयिताने हमालांच्या मार्फत अंबुजा कंपनीच्या १०० सिमेंट गोण्या चोरून नेल्या अधिक तपास हवालदार गोसावी करीत आहेत.
