नाशिक (इंडिया दर्पण वृत्तसेवा)- सिडकोतील दिव्या अ‍ॅड लॅब भागात दोघा मित्रांना त्रिकुटाने बेदम मारहाण केल्याची घटना घडली. या भागातील नसल्याच्या संशयातून ही मारहणा करण्यात आली. या घटनेत हातातील लोखंडी कड्याने मारहाण केल्याने जळगाव येथील दोघे युवक जखमी झाले असून, याप्रकरणी अंबड पोलिस ठाण्यात गुन्हा दाखल करण्यात आला आहे.
रितेश मुकेश पाटील (२५ मुळ रा. जळगाव हल्ली निसर्ग कॉलनी,पाथर्डीफाटा) या युवकाने याबाबत तक्रार दाखल केली आहे. पाटील व शुभम माणिक माने (२१) हे दोघे मित्र शनिवारी (दि.३०) सिडकोतील दिव्या अ‍ॅड लॅब भागात गेले असता ही घटना घडली. सावतानगर येथील सायंतारा वडे वाला या दुकानासमोरून दोघे मित्र जात असतांना अज्ञात तीन जणांनी त्यांची वाट अडविली.
यावेळी त्रिकुटाने तुम्ही येथील दिसत नाही असे म्हणून कुठले ही कारण नसतांना शिवीगाळ व दमदाटी करीत दोघा मित्रांना लाथाबुक्यानी मारहाण केली. या घटनेत हातातील लोखंडी कड्याने मारहाण करण्यात आल्याने पाटील व माने जखमी झाले असून अधिक तपास हवालदार राऊत करीत आहेत.
किरकोळ कारणातून टोळक्याने दांम्पत्यास बेदम मारहाण…गुन्हा दाखल
नाशिक (इंडिया दर्पण वृत्तसेवा)- किरकोळ कारणातून टोळक्याने दांम्पत्यास बेदम मारहाण केल्याची घटना तिडके कॉलनीतील मिलींदनगर भागात घडली. या घटनेत लोखंडी रॉड व लाकडी दांडक्याचा वापर करण्यात आल्याने पती जखमी झाला असून पत्नीच्या गळयातील मंगळसूत्र तुटून गहाळ झाले आहे. याबाबत मुंबईनाका पोलिस ठाण्यात गुन्हा दाखल करण्यात आला आहे.
विशाल जाधव, बाबू गायकवाड, ऋषिकेश अंबारे व अन्य साथीदार (रा.मिलींदनगर) अशी दांम्पत्यास मारहाण करणा-या संशयितांची नावे आहेत. याबाबत समाधान काशिनाथ साबळे (३५ रा.मिलींदनगर,तिडके कॉलनी) यांनी फिर्याद दाखल केली आहे. शनिवारी (दि.२९) रात्री ही घटना घडली. संशयित टोळक्याने किरकोळ कारणाची कुरापत काढून दांम्पत्यास शिवीगाळ व दमदाटी करीत मारहाण केली.
या घटनेत लोकंडी रॉड व लाकडी दांडक्याचा वापर करण्यात आल्याने फिर्यादी साबळे जखमी झाले असून, यावेळी झालेल्या झटापटीत त्यांच्या पत्नीच्या गळय़ातील महागडे सोन्याचे मंगळसूत्र गहाळ झाले आहे. अधिक तपास उपनिरीक्षक शेळके करीत आहेत.
