नाशिक (इंडिया दर्पण वृत्तसेवा) – विद्यार्थी हि राष्ट्राची संपत्ती आहे. खिलाडूवृत्ती जोपासलेली व्यक्ती आयुष्यात कधीच खचून जात नाही तर सातत्याने पुढे जाते. विद्यार्थ्यानी विविध खेळांतून नवनवीन कौशल्ये व प्राविण्य आत्मसात करावे. यासोबतच सांघिक भावना वृद्धिंगत करून देशाचे नाव उज्वल करावे, असे प्रतिपादन केंद्रीय आरोग्य व कुटुंब कल्याण, आदिवासी विकास राज्यमंत्री डॉ.भारती पवार यांनी केले. आज येथील गरूड झेप अकॅडमी, दुगाव येथील भव्य प्रांगणात आयोजित आदिवासी विकास विभागाच्या एकलव्य मॉडेल रेसिडेंशियल स्कूलच्या राज्यस्तरीय क्रीडा स्पर्धा 2023-24 च्या उद्घाटन प्रसंगी त्या बोलत होत्या.
याप्रसंगी आदिवासी विकास विभागाचे अपर आयुक्त नाशिक संदिप गोलाईत, तुषार माळी, सहसंचालक हितेश विसपुते, उपायुक्त संतोष ठुबे, विनिता सोनवणे यांच्यासह क्रिडा शिक्षक, क्रिडा प्रशिक्षक, राज्यभरातून आलेले खेळाडू, विद्यार्थी मोठ्या संख्येने उपस्थित होते.
यावेळी बोलतांना केंद्रीय आरोग्य राज्यमंत्री डॉ.भारती पवार म्हणाल्या, केंद्र व राज्य शासनाने खेळांवर विशेष लक्ष दिले आहे. विद्यार्थ्यांचा खेळातील सहभाग वाढावा, खेळांतून उत्तम खेळाडू तयार व्हावेत, राज्यासोबतच देशाचे प्रतिनिधीत्व करून खेळाडूंनी ऑलिम्पिक सारख्या स्पर्धांतून खेळाडूंनी आपल्या राष्ट्राचे नाव उज्वल करावे हाच यामागील हेतू आहे. पंतप्रधान नरेंद्र मोदी यांनीही खेलो इंडियाचा मंत्र देवून वेगवेगळ्या खेळांच्या स्पर्धांच्या आयोजनातून खेळाडूंचे मनोबल वाढविले आहे. खेळात मेहनत व एकाग्रता हे गुण महत्वाचे असून यांचा उपयोग खेळासोबतच अभ्यासातही विद्यार्थ्यांना होतो. विद्यार्थ्यांना क्रीडा स्पर्धांच्या माध्यमातून वेगवेगळ्या राज्यात जाण्याची संधी मिळते त्यादृष्टीने हिंदी व इंग्रजी भाषेवरील प्रभुत्व विद्यार्थ्यांनी वाढविण्यासोबतच इतर भाषा ही शिकण्याचा प्रयत्न केला पाहिजे. एकलव्य मॉडेल रेसिडेंशियल स्कूलमधून सीबीएससी बोर्डच्या माध्यमातून निश्चितच याकडे लक्ष दिले जात आहेत. स्पर्धेसाठी आलेल्या विद्यार्थ्यांना स्पर्धा झाल्यानंतर नाशिकच्या संस्कृतीचे दर्शन करावे असे सांगुन ‘ना हारना जरुरी है, ना जितना जरूरी है, ये जिंदगी एक खेल है, इसे खेलना जरूरी है’ अशा शब्दात विद्यार्थ्यांचे मनोबल वाढवत राज्यभरातून स्पर्धेसाठी आलेल्या विद्यार्थ्यांना केंद्रीय आरोग्य राज्यमंत्री डॉ. भारती पवार यांनी शुभेच्छा दिल्या.
अपर आयुक्त, आदिवासी विकास आयुक्तालय, नाशिक तुषार माळी प्रास्ताविकात म्हणाले, 27 ते 29 डिसेंबर 2023 या तीन दिवसीय राज्यस्तरीय क्रीडा स्पर्धेत राज्यातील 37 एकलव्य स्कूलमधून 865 मुले व 865 मुली असे जवळपास 1 हजार 730 विद्यार्थी 10 क्रीडा प्रकारात सहभागी होत असून 3 वेगवेगळ्या मैदानात या स्पर्धा होणार आहेत. स्व.माँ.मिनाताई ठाकरे स्टेडियम, पंचवटी येथे ॲथलेटिक्स, के.टी.एच.एम कॉलेज नाशिक येथे हॉकी व फुटबॉल स्पर्धा होणार आहेत. या राज्यस्तरीय स्पर्धांमध्ये वैयक्तिक खेळांमध्ये ॲथलेटिक्स, योगा व अर्चरी यांचा समावेश आहे तर सांघिक खेळांमध्ये कबड्डी, खो-खो, व्हॉलीबॉल, फुटबॉल, हॉकी, हॅण्डबॉल, बास्केटबॉल इत्यादी खेळांचा समावेश असल्याची माहिती अपर आयुक्त तुषार माळी यांनी दिली.
कार्यक्रमाच्या सुरवातीला दीपप्रज्वलन, क्रीडा ज्योत प्रज्वलन व खेलध्वजाचे अनावरण मान्यवरांच्या हस्ते झाले. केंद्रीय राज्यमंत्री डॉ.भारती पवार यांच्या हस्ते खेळाडूंच्या समवेत रंगीत फुगे हवेत सोडून राज्यस्तरीय स्पर्धांचे उदघाटन संपन्न झाले.
