इंडिया दर्पण ऑनलाईन डेस्क
नवी दिल्लीः निवडणूक कोणती असो त्यासाठी भाजपचे प्लॅनिंग हे वेगळे असते.. पण, या निवडणुका आता सर्वात महत्त्वाच्या असल्यामुळे भाजपने त्यासाठी कोठेही गाफील न रहाता मायक्रो प्लॅनिंग केले आहे. हिंदी पट्ट्यातील पाच राज्यांच्या विधानसभा निवडणुकीत नेत्रदीपक विजय मिळवल्यानंतर भाजपने आता लोकसभा निवडणुकीची तयारी सुरू केली आहे. काही महिन्यांवर येऊ घातलेल्या निवडणुकांसाठी पक्षाने देशभर मॅरेथॉन संघटनात्मक बैठका घेऊन निवडणुकीची तयारी सुरू केली आहे. राष्ट्रीय पदाधिकारी बैठकीनंतर पक्ष आता अॅक्शन मोडमध्ये आहे. ३१ डिसेंबरपूर्वी राज्य अधिकारी आणि जिल्हास्तरावर बैठका होणार आहेत.
भाजप अध्यक्ष जेपी नड्डा आणि केंद्रीय गृहमंत्री अमित शाह पश्चिम बंगालमध्ये आहेत. याठिकाणी दिवसभरात पक्षाच्या तीन मोठ्या बैठका होणार असून त्यात सर्व राज्यस्तरीय नेत्यांना बोलावण्यात आले आहे. याशिवाय पक्षाचे दोन्ही प्रमुख नेते आयटी सेल आणि तरुण आणि इतर मोर्चाच्या नेत्यांचे वर्गही घेणार आहेत. मोदी, नड्डा, शाह कार्यकर्त्यांशी चर्चा करणार आहेत. लोकसभा निवडणुकीपूर्वी कार्यकर्त्यांना चार्ज करण्यासाठी पंतप्रधान नरेंद्र मोदी, शाहाआणि जेपी नड्डा राष्ट्रीय पदाधिकारी बैठकीचा संदेश देणार आहेत. पाच जानेवारीपूर्वी सर्व आघाड्यांची राज्यस्तरीय बैठक होणार आहे. युवा मोर्चाचे नेते नवीन मतदारांची बैठक घेणार आहेत.
राष्ट्रीय मतदार दिनी २४ जानेवारीला युवा मोर्चाच्या वतीने पाच हजार ठिकाणी नवीन मतदारांसोबत बैठका होणार आहेत. किमान सात लाख गावांमधून किमान एक नवीन कार्यकर्ता जोडणे हे त्याचे उद्दिष्ट असेल. यासह भाजपच्या मतदारांची संख्या वाढविण्याचे लक्ष्य ठेवण्यात आले आहे. गावोगावी मोहीमही राबवली जाणार आहे. पक्षाने अधिकाधिक लोकांशी जनसंपर्क साधावा यासाठी जानेवारी-फेब्रुवारीमध्ये ‘गाव चलो अभियान’ राबविण्यात येणार आहे. लोकसभा निवडणुकीच्या तयारीसाठी भाजपचा आराखडा तयार आहे. प्रत्येक लोकसभा एक क्लस्टर बनवण्यात येणार असून, वरिष्ठ नेते हे क्लस्टर प्रभारी, प्रत्येक लोकसभेसाठी प्रभारी आणि समन्वयक बनणार आहेत. जिंकलेल्या आणि हरलेल्या सर्व प्रकारच्या बूथचे विश्लेषण केले जाईल. समाजातील विविध घटकांशी संपर्क साधून त्यांना पक्षात प्रवेश दिला जाईल. प्रत्येक राज्यात ५० ठिकाणी युवक, महिला एससी एसटी परिषदा आयोजित केल्या जातील. प्रत्येक झोनमध्ये सोशल मीडिया प्रभावकांची बैठक होणार आहे.
