नाशिक (इंडिया दर्पण वृत्तसेवा) – राजेंद्र (नाना) सूर्यवंशी यांच्या सहकार्याने व नाशिक जिल्हा क्रिकेट असोसिएशनच्या वतीने आयोजित किशोर सूर्यवंशी मेमोरियल ट्रॉफी आंतर तालुका क्रिकेट स्पर्धेत हुतात्मा अनंत कान्हेरे मैदान, गोल्फ क्लब, मैदानावर अंतिम सामन्यात सुरगाणा संघाने मालेगाव संघावर ५ गडी राखून विजेतेपद पटकावले. शेवटच्या चेंडू पर्यंत रंगलेल्या या सामन्यात स्पर्धेच्या अंतिम फेरीत प्रथमच पोहोचलेल्या सुरगाणा संघाने हि दहावी किशोर सूर्यवंशी मेमोरियल ट्रॉफी जिंकली.
अंतिम सामन्यानंतर लगेच सूर्यवंशी परिवाराच्या सहकार्याने नियमित पणे होत असलेल्या या स्पर्धेचा पारितोषिक वितरण सोहळा झाला. कै. किशोर सूर्यवंशी यांचे बंधु महाराष्ट्र राज्याचे उत्पादन विभागाचे आयुक्त मा. विजय सूर्यवंशी याप्रसंगी प्रमुख पाहुणे होते. यांचेसह मंचावर राज सूर्यवंशी, महाराष्ट्राचे माजी खेळाडू अपूर्व दराडे , नाशिक जिल्हा क्रिकेट संघटनेचे – सह सचिव योगेश -मुन्ना- हिरे , सेक्रेटरी समीर रकटे , निवड समिति सदस्य सतिश गायकवाड स्थानापन्न होते. तसेच एनडीसीएचे इतर पदाधिकारी, संघ प्रशिक्षक, उपांत्य व अंतिम फेरीतील संघ आदी उपस्थित होते. याप्रसंगी योगेश -मुन्ना- हिरे यांनी समयोचित भाषण केले. प्रमुख पाहुणे विजय सूर्यवंशी यांनी खेळाडूंना मार्गदर्शन करत या स्पर्धेतूनच भावी राष्ट्रीय दर्जाचे खेळाडू मिळावेत अशी अपेक्षा व्यक्त केली. सेक्रेटरी समीर रकटे यांनी आभार मानले. या छोट्याशा आटोपशीर सोहळ्याचे सूत्रसंचालन केले विवेक केतकर यांनी केले.
अंतिम सामन्यात प्रथम फलंदाजी करत मालेगाव संघाने ६ बाद ११६ धावा केल्या. अजिंक्य खापरेने सर्वाधिक २६ धावा केल्या. रामदास धुम ने ३ बळी घेतले . सुरगाणा संघाने विकास राठोड च्या फटकेबाज नाबाद ४४ धावांच्या जोरावर शेवटच्या चेंडूवर विजयी धाव घेतली. मंगेश शिरसाट यांनी सुरगाणा संघाचे प्रशिक्षक होते .
स्पर्धेतील सर्वोत्कृष्ट फलंदाज ठरला नाशिक ग्रामीणचा नितीन कडाळे – १४७ धावा . सर्वोत्कृष्ट गोलंदाज म्हणून सुरगाणाचा तुषार धुम – १० बळी तर सर्वोत्कृष्ट यष्टीरक्षक म्हणून मालेगावचा किशन पेंढारकर – यष्टीमागे ९ बळी – यांनी पारितोषिक मिळवले . मालिकावीराचा बहुमान मिळवला सुरगाणाचा हेमंत चौधरीने – १५० धावा व ८ बळी .
या टी-ट्वेंटी सामन्यांच्या स्पर्धेमुळे नाशिक जिल्ह्यातील तालुक्यातील खेळाडूंना जिल्हास्तरावर आपल्या कामगिरीचे प्रदर्शन करण्याची संधी मिळते. या स्पर्धेसाठी खास नाशिक जिल्हा क्रिकेट संघटनेच्या विविध निवड समिती सदस्यांनी, जिल्ह्याच्या सर्व १५ तालुक्यात जाऊन निवडीची प्रक्रिया पूर्ण करून प्रत्येक तालुक्याचा अंतिम संघ निवडला .जिल्ह्यातील सर्व १५ तालुक्यांनी या स्पर्धेत भाग घेतला. चार गटात १५ संघात २३ साखळी व बाद फेरीचे ३ असे एकूण २६ सामने झाले.
